Здружението на историчари упати реакција, како што велат, по повод отсуството на Историјата во наставните програми за VI одделение.
„На 22 декември 2022 година до Министерството за образование и наука поднесовме барање за повлекување на учебникот по новововедениот предмет „Историја и општество“ за V одделение. Истото го поткрепивме со критичка анализа на 30 страници, во која нотиравме 60 сериозни пропусти и грешки во концепциска, содржинска и методолошка смисла, пришто предупредивме дека истите ќе создадат кај учениците погрешни претстави не само за минатото, туку и за сегашноста. Јавно прашуваме дали овој учебник е повлечен од употреба, со оглед дека посочените пропусти ги надминуваат законски предвидените 30%“, се вели во реакцијата.
Здружението тврди дека е погрешно поставена концепцијата за основното образование и бара да се утврди нова.
„Оттука и отсуството на Историјата во наставните програми за шесто одделение, за нас воопшто не е изненадување. Причината е што ние како Здружение, како и генерално историската фела во државата, одбиваме да учествуваме во нивната подготовка, со оглед на нашето неприфаќање на Концепцијата. На тој начин го изразуваме категоричното противење што е укинат предметот Историја (воведен во македонската држава од АСНОМ), за сметка на погрешно конципираниот и новоконструиран предмет „Историја и општество“, во кој вештачки се интегрирани предметите историја, граѓанското образование и географија“, реагираат историчарите.
Тие обвинуваат дека „историјата се маргинализира и деградира“ и им изразуваат поддршка на наставниците чии работни места се доведени во прашање поради кратењето на бројот на часови по историја.
„Историјата мора да остане посебен предмет и воедно ги поддржуваме колегите кои сметат дека предметите Географија, Граѓанско образование, Биологија, Хемија, Физика треба да се изучуваат посебно“, се додава во реакцијата.
Историчарите бараат и додека не се подготви и усвои нова концепција, да се продолжи со досегашните наставни програми наместо тие да бидат „подредени на задоволување на моменталните политички цели“.