Одлука од Кривичниот совет по жалбата за 30 дневниот притвор на Мухамед Зеќири се уште не сме добиле, но денеска  околу 14 часот тој беше спроведен од затворот во Кривичниот суд каде што присуствуваше на седницата на советот, изјави Филип Андов, директорот на затворот во Шутка за Нова.

Одбраната на сега веќе поранешниот генерален секретар на Владата Зеќири поднесе приговор со кој побара укинување на одредената мерка притвор на барање на Обвинителството за организиран криминал .

Зеќири е во притвор од петокот под сомнение дека без јавна набавка, во четири очи склучил договор со хрватска фирма за изработка на физибилити студија за „Македонски пошти“.

Двајцата хрватски државјани засега не се достапни за органите на прогон.

Обвинителката Вилма Русковска тврди дека има цврсти докази дека јавната набавка била незаконска.

– Секоја набавка над 400.000 евра треба да има и меѓународен тендер, не е побарана ни согласност од Биро за јавни набавки, сега засега, предметот ни е чист со овие докази кои ни се обезбедени. Не знам како функционира Владата, но генералниот секретар располага со целиот буџет на Владата. Оттаму донеле постапка за консултанска услуга, но ова е направено во четири очи- изјави Русковска по приведувањето на осомничениот поранешен генерален секретар.

С.М.