Иницијативата „Зелен хуман град“ од претседателот на државата, Стево Пендаровски, бараат да не стави потпис на најавените измени во Изборниот законик. Според нив, тие се косат со Уставот и со законите.
Изборните измени се груба манипулација од страна на големите политички партии. Со воведувањето минимален праг од 2% од запишаните избирачи за независните листи да добијат право да се кандидираат на претстојните локални избори, големите партии вршат манипулација и се обидуваат да го попречат излегувањето на престојните локалните избори на независни кандидати, а со самото тоа се зголемуваат бирократските пречки на процесот. Ваков став граѓанската иницијатива „Зелен хуман град“ во отворено писмо му испрати на претседателот на државата, Стевио Пендаровски. Според нив, со ова се штитат интересите на големите политички партии и се зголемува нивната моќ, а се спречуваат помалите независни групи на граѓани и граѓански активисти да се кандидираат на изборите закажани за 17 октомври.
– Ве известуваме дека доколку се усвојат вакви измени на Изборниот законик, тоа ќе значи прекршување на Уставот, поконкретно членовите 2, 9, 20, 23, 110, 115 и 117 во кои: – се штитат правата и слободите на граѓаните што се однесуваат на политичкото здружување и дејствување и забраната на дискриминација по основ на политичка припадност; – се гарантира слободата на здружување заради остварување и заштита на нивните политички уверувања; – се гарантира правото на претставеност во локалната самоуправа, наведуваат од „Зелен хуман град“ во испратеното писмо до претседателот Пендаровски.
Според нив, предложените измени се косат и со меѓународните практики и препораките од Венецијанската комисија и ОБСЕ/ОДИХР.
– Најпрво, ако доследно се следат препораките, во Извештајот на ОБСЕ од 2017 г. е наведено дека „потписите за поддршка не треба да надминат еден процент од регистрираните гласачи” зашто тоа е спротивно на добрата практика. Се наведува и дека „Треба да се размисли за стандардизирање на потребниот број на потписи за независните кандидати на најмногу еден процент од регистрираните гласачи во согласност со меѓународните добри практики. Покрај ова, како што е претходно препорачано, треба да се размисли за обезбедување алтернативни методи за прибирање потписи, со цел да се намали потенцијалот за заплашување”, наведуваат од „Зелен хуман град“.
Тие наведуваат дека членот 62 од Изборниот законик ниту еднаш не е сменет од денот на стапување на сила на Законот, уште од 2006 година.