Полскиот претседател денеска изјави дека сака да му го одземе највисокото полско одликување на украинскиот претседател Володимир Зеленски, откако Украина преименуваше армиска единица по националистичките востаници кои убиваа Полјаци за време на Втората светска војна, објави „Ројтерс“.
Полска беше еден од најсилните поддржувачи на Кијив за време на руската војна во Украина, а поранешниот претседател Анджеј Дуда во 2023 година му го додели на Зеленски Орденот на Белиот орел.
Но, Зеленски предизвика негодување во Полска откако потпиша указ со кој се признава придонесот на една украинска единица на специјалните сили во борбата против руските сили, преку нејзино именување по Украинската востаничка армија (УПА).
Дел од Украинците ја сметаат УПА за херојска поради отпорот што го пружила против Советскиот Сојуз и против нацистичка Германија, како и за симбол на борбата на Кијив за независност од Москва.
Но, УПА била вмешана и во масакрите во Волинија, серија убиства од 1943 до 1945 година, во кои Полска тврди дека украински националисти убиле околу 100.000 Полјаци. Илјадници Украинци, исто така, загинале во одмазднички убиства.
Глорификацијата на УПА ѝ даде многу простор на руската пропаганда за дезинформации, им изјави денеска Навроцки на новинарите во Варшава.
Тој рече дека поддршката за Украина против Русија е стратешка цел за Полска. Но, додаде дека Капитулот на Орденот на Белиот орел, советодавно тело што го надгледува највисокото и најстаро државно одликување во Полска, ќе се состане на 8 јуни.
Предложив една од точките на дневниот ред да биде одземањето на Орденот на Белиот орел на претседателот Зеленски, рече тој, објаснувајќи дека се потребни „одредени механизми“, како состанок на Капитулот, пред да може да донесе конечна одлука.
Навроцки, кој настапува од конзервативно-националистички позиции и во кампањата ветуваше политика „Полјаците на прво место“, ја отвори темата во период кога дел од полската јавност покажува замор од големиот број украински бегалци во земјата.
Полското МНР оцени дека именувањето украинска единица по УПА ја повредува меморијата на жртвите и го нарушува дијалогот меѓу Варшава и Кијив.
Од кабинетот на Зеленски не сакаа директно да ги коментираат изјавите, туку само изразија благодарност за полската поддршка.
Зеленски го доби Орденот на Белиот орел во 2023 година за придонес кон демократијата, мирот и европската безбедност.