Задржувањето на препораката за преговорите е добрата работа, но извештајот во целина содржи многу критики за состојбата во земјата и за продолжената политичка криза, најголема од 2001, рече евроамбасадорот Самуел Жбогар на прес конференцијата во Скопје.
– Ќе почнам со позитивната вест, а тоа е дека повторно е дадена позитивна препорака со услов спроведување на Договорот од Пржино, организирање кредибилни избори и спроведување на реформските приоритети, рече Жбогар.
Одејќи во детали на Извештајот, евроамбасадорот рече дека тој не е добар, поради назадувањето во областа на владеење на правото, судството, недоволниот напредок во реформата на јавната администрација, поради то што корупцијата се уште преовладува во многу области, а неопходен е напредок и борбата против перењето пари. Како сериозен предизвик ја посочи и состојбата со медиумите, бидејќи како што рече нема различност и балансираност во известувањето.
– Има позитивно признание за улогата на специјалниот обвинител. Неговата канцеларија е воспоставена и има проактивна улога за истражување на случаите кои произлегоа од прислушуваните материјали. Специјалното обвинителство е дел од политичкиот договор и треба да продолжат напорите да има правна разрешеница. Парламентот, пак, мора да ја утврди политичка одговорност за прислушуваните материјали и за нивната содржина, изјави Жбогар.
Жбогар рече дека позитивно е тоа што политичките лидери постигнале изборите да се одржат во декември со што се поплочува патот за излез од политичката криза.
– Кризата трае премногу долго. Државните институции треба да ја вратат својата кредибилност, а ЕУ е подготвена да ве поддржи во трансформирањето на вашата земја во она што таа заслужува и сака да биде- демократско, динамично и просперитетно место што може да им понуди на своите граѓани стабилност и подобри перспективи за во иднина, нагласи Жбогар.
Исто така тој посочи дека граѓанските организации и натаму изразуваат загриженост за влошувањето на климата во која дејствуваат и ограниченоста на владата за дијалог и исто така за јавните напади од страна на политичари и провладини медиуми.
-Владата што треба да биде формирана по изборите на 11-ти декември, треба да ја искористи оваа можност и оваа условена препорака да ја претвори во без условна, рече евроамбасадорот Жбогар на прес конференцијата во Делегацијата на ЕУ во Скопје.