Изборната кампања поминува во мирна и фер атмосфера е заедничката оценка на шефот на изборниот штаб на ДУИ, Беким Незири, и на евроамбасадорот Самуел Жбогар, кои денеска се сретнаа во седиштето на ДУИ во Мала Речица.

– Неговиот став беше дека се исполнети сите услови за веродостојни и фер избори. Но, до 11 декември има уште време, така што се надеваме дека и понатаму ќе продолжиме во овој дух, во дух на мирна, демократска и фер изборна атмосфера – изјави Незири.

Незири додаде дека Жбогар укажал на националистичката реторика во говорите на дел од политичките партии.

– Се надеваме дека ќе продолжиме во овој дух на мирни и демократски избори. На секои избори малку се зајакнува реториката. Тоа беше и примедбата од страна на амбасадорот, што помалку да има националистичка реторика и реторика што на некој начин индиректно би влијаела да имаме избори што би биле под своевиден притисок, односно избори што би ескалирале, рече Незири и потенцира дека не очекува да има некаква ескалација до денот на изборите.

Средбата, нагласи Незири, беше иницирана од амбасадорот Жбогар и траеше околу еден час. По завршувањето на посетата во Мала Речица амбасадорот не даде изјава за медиумите.