Жителите на Ново Маало се подготвени со тужби доколку е тоа потребно да се спротивстават на обидите за блокирање на реализација на комплексот „Гранд“. Велат дека се револтирани од реакциите на граѓанската иницијатива „Шанса за Центар“ и нивниот обид да се суспендира градбата на комплексот на паркингот спроти „Холидеј Ин“ која почна пред десетина дена.
– Изминативе 70 години ние бевме жртви на институциите кои нè водеа низ бескрајни лавиринти и нема да дозволиме некои активисти да си поигруваат со нас. Токму поради тие активисти и конкретно сега актуелната советничка во Општина Центар Јана Белчева, ние со години не смеевме да направиме никаква интервенција на сопствениот дом, за колку-толку да си ги подобриме условите за живот, вели Игор Стојанов жител на Ново Маало.
Тој и останатите жители од оваа локација, и забележуваат на Јана Белчева за мораториумот за градби во Центар што го изгласа Советот на општината во 2017 година а поради што претрпеле штета додавајќи, оти таа не кажува зошто е исклучен спорниот ДУП Ј07 на Водно.
– Таа личниот интерес го става пред интересите на нејзините сограѓани во Општина Центар кои ги држи во агонија цели три години со нејзиниот незаконски мораториум. Воедно, најавуваме и дека ќе поднесеме претставка до Советот на Општина Центар, до градоначалникот и до Антикорупциска да го истражат овој случај, а ги покануваме и медиумите сами да истражат зошто ДУП Ј07 не беше под мораториумот на Јана Белчева. Никој нема право да одлучува за нашите имоти и нашите животи и многу важно за сите таканаречени активисти – Ново Маало не е јавен простор, порача Стојанов.