Службеникот на БИА, Србинот Горан Живаљевиќ, во најновото свое гостување во српски медиум, тврди дека по службена должност се нашол во македонското Собрание на 27.април кога беа нападнати пратениците од тогашната опозиција и новинарите.
Тој потенцира дека неговото име се користи во јавноста за да се одвлече вниманието од вистинските провокатори и насилници.
Живаљевиќ тврди дека во Собранието дошол дури два часа по насилството, а во прилог на своето тврдење дека се одвлекува вниманието од вистинските насилници го споменал присуството на Игор Југ, поддржувач на Хрватските ослободителни сили (ХОС), кој бил облечен во кошула со шаховница и можеби, имал и оружје. Според него, Југ не бил уапсен, ниту, пак, тепачите со маски.
Тој смета дека единствен доказ за неговото присуство внатре било „селфито” што тој самиот го испратил на советникот на безбедност на македонскиот претседател, Синиша Алексоски.
Алексоски тогаш бил во Охрид и кога, како што изјавил, го прашал каде е му го пратил „селфито“ од Собранието.
Тој посочи дека целата афера избила речиси еден месец по настаните во Собранието, но кога приказната за него како тепач не поминала требало да му се прикачи дека е поврзан со руската разузнавачка служба.
„Требаше да се најде моја врска со руските служби. Патем, јас никогаш не сум бил во Русија и никогаш не сум бил во контакт со некој Русин. Се дружев со претставници на сите главни служби, но никогаш со Русите”, рече Живаљевиќ.
Тој вели дека околу 19 часот на 27.април примил повик од Белград и му било кажано дека е можно проширување на судирите со српски навивачки групи и дека треба да ги лоцира и да ги спречи, а со тоа и да ги извести македонските служби.
Дозволата за тоа, кој му ја дал да се најде внатре во македонскиот Законодавен дом, се уште е мистерија, откако тој прво посочи дека македонските служби му дале дозвола а потоа дека добил дозвола од претседателот на Македонија, Ѓорѓе Иванов, односно негов советник.
Партијата ВМРО-ДПМНЕ тврди дека ниту една институција додека тие управувале со власта во Македонија, нема дадено дозвола и дека ако таква постои, сегашната влада предводена од СДСМ, требало да ја објави во јавноста.