Не можам да ви ветам датум – рече високиот претставник на ЕУ Жозеп Борел, на денешната заедничка прес-конференција со премиерот Ковачевски, по средбата што ја имаа во владата, откако новинарите инсистираа тој да одговори на прашањето дали Северна Македонија ќе ги почне преговорите во јуни.
Борел ја поздрави поддршката на Северна Македонија на Украина и на украинскиот народ, и што нашата земја се придружи кон санкциите за Русија, но подвлече дека добивањето датум за пристапни преговори ќе се случи кога ќе биде изнајдено решение со Бугарија и ќе биде постигнат напредок во реформите.
Премиерот Димитар Ковачевски рече пак дека добивањето на датумот има стратешко значење за Унијата и за регионот, поради случувањата во Украина и додаде дека Северна Македонија треба да почне преговори без одлагање.
„Со премиерот Петков на Бугарија градиме нов дух на пријателство, и сме посветени на изнаоаѓање решение. Тоа решение треба да биде во согласност со Уставот и законите, со взаемно почитување на двете држави и двата народи и во согласност со Резолуцијата што ја донесовме во нашето Собрание“, рече Ковачевски кој на новинарското прашање дали побарал денес од Борел датум во јуни, рече дека не се врзува за датуми туку за процеси.
Подетално за пораките од прес-конференцијата во поширок извештај на Нова.
(С.К.)