Судија на претходна постапка при Основниот кривичен суд Скопје го прифати барањето на адвокатите на Зоран Милески, познат како Зоки Кичеец кој е второосомничен за „Рекет“ и мерката притвор му ја замени со куќен притвор. Одлуката е донесена откако Судот добил позитивно мислење од Обвинителството за гонење на организиран криминал.
„Денеска по добиено позитивно мислење од обвинителството, предлогот на одбраната да биде уважен како основан, судијата на претходна постапка, согласно Законските одредби, донесе решение со кое мерката притвор се укинува и се определува мерка куќен притвор.
Со оглед дека жалбата не го одлага извршувањето, решението е испратено до странките, а обвинетиот ќе биде спроводен на издржување на мерката куќен притвор во неговиот дом“ рекоа од Судот.
Зоран Милески утре е повикан во Обвинителството да изврши увид во доказите и да даде исказ.
Тој оди во куќен притвор, само два дена откако Обвинителството соопшти дека е завршена истрагата за Рекет.
И адвокатите на Катица Јанева изјавија дека со завршувањето на истрагата нема повеќе основи таа да биде во притвор.
Тие најавија дека веднаш откако ќе го добијат известувањето дека истрагата е завршена ќе поднесат барање до Судот, таа да излезе од затворот во Шутка.
Адвокатите на Јанева: Со завршување на истрагата, таа треба да биде ослободена од притвор
Зоран Милевски е во притвор од јули, односно повеќе од два месеци. Тој беше уапсен истиот ден со Боки 13 и се осомничени за примање на награда за противзаконито влијание односно дека за износ од 1,5 милиони евра кои ги зеле од Камчев требало да му обезбедат ослободување од случајот „Империја“ на СЈО.
Зоран Милески за разлика од Бојан Јовановски веќе даде исказ кај Русковска за случајот Рекет, додека истрагата се уште траеше.