Одбраната на поранешниот министер за внатрешни работи Митко Чавков денеска на јавната седница во скопска Апелација на која се расправа по жалбата за притворот, побара тој да биде пуштен да се брани од слобода или притворот да му се замени со поблаги алтернативни мерки.
Чавков рече дека материјалните докази ќе покажат дека раководел со акцијата за смирувањето на состојбата во Собранието на Македонија на 27 април.
– Од материјалните докази ќе се види дека со раководењето на акцијата во едни специфични околности дадов клучен допринос за спасување на животите на пратениците и нивна дислокација на безбедно, рече тој пред тричлениот судски совет.
Тој истакна дека е инволвиран во еден апсурден случај кој како што рече е темна дамка за македонскиот кривично правен систем.
– Апсолутно не се чувствувам виновен и тоа ми дава сила и покрај мојата здравствена состојба да истраам и во една легална процедура и да ја докажам мојата невиност, рече Чавков.
Претставникот на Вишото јавно обвинителство бара да се одбие жалбата бидејќи, притворот е непходен за обезбедување на присуство на Чавков.
Во Апелацискиот суд денеска се појави и Игор Дурловски.
Адвокатот Еленко Миланов рече дека осомничениот не повикувал на насилство во Собранието и не ги упатувал присутните во салата и побара притворот во истражниот затвор да му биде заменет со домашен притвор.
Обвинителката од Вишото јавно обвинителство рече дека бара мерката притвор да остане бидејќи Дурловски бил во највисокиот законодавен дом за време на настаните на 27 април минатата година.