Девојчиња од седмо одделение во основното училиште „Кирил и Методиј“ од Македонска Каменица денеска биле вакцинирани против ХПВ, без знаење на нивните родители. Девојчињата биле однесени во диспанзерот за вакцинација со образложение дека одат на систематски преглед, без да им биде кажано дека ќе бидат вакцинирани. Со оваа вакцина против рак на грлото на матката се опфатени девојчиња од 12 годишна возраст
Една од мајките најавува тужба до училиштето бидејќи не ја известиле дека нејзината 12 годишна ќерка ќе биде вакцинирана.
„Ова е пропуст на училиштето и ќе поднесам тужба. Утринава ќерка ми дојде да ја земе здравствената книшка и кажа дека ќе одат на систематски преглед. Но,таму ги вакцинирале, а нас како родители кои го имаме последниот збор во одлуката, не не известија за тоа. Во консултација со лекари и педијатри категорично одлучив дека ќерка ми нема да ја прима вакцината против ХПВ. Чудно е што обично за екскурзии или безначајни работи не викаат на родителски состанок, а сега кога се работи за здравјето на нашите деца не не информираа. Не прашаа ниту дали некое од девојчињата прима терапија, дали има здравствени проблеми бидејќи во таква ситуација не се прима прима вакцина “ изјави за НОВА Анета Стојчевска, мајка на едно од девојчињата кои утринава примиле вакцина против ХПВ.
Таа веднаш побарала објаснување во училиштето, каде што смета дека се одговорни за случајот. Директорот бил фрапиран од тоа што го слушнал и соопштил дека ќе ги казни сите штос е инволвирани, класните раководители и психологот..
За овој случај кој предизика многу негодувањa, НОВА побара објаснување од директорот Димче Атанасовски. Тој призна дека во училиштето бил направен пропус, но тој лично не бил запознаен со она што се случувало претходно.
„Сите сме затечени од тоа што се случи. Направен е пропуст и ќе понесеме одговорност. Денеска се вакцинирани девојчињата од еден клас, утре другите. Барав објаснување од одговорните во училиштето и тие ми образложија дека од диспанзерот усно, по телефон им соопштиле дека учениците треба да одат на систематски преглед, а вакцината не била спомната“, изјави за НОВА Атанасовски.
Главна тема на расправа во училиштето, а и во градот денеска беше овој немил настан, кој можел да има и несакани последици.
Во Здравствениот дом во Македонска Каменица, во одделот за вакцинации тврдат дека не е точно дека училиштето не било известено за вакцинацијата.
„Училиштето усно беше известено како и секогаш, дека ќе има систематски преглед и вакцинација за девојчињата од 12 години. Зошто не им го пренеле тоа на родителите и децата, не знаеме“, велат во Здравствениот дом.
Освен тужбата која ја најавува Стојчевска, овој скандал предизвика реакции и на социјалните мрежи, така што родители коментираат дека и порано имало случаи кога родителите не биле извесувани дека ќе им бидат вакцинирани против ХПВ.
Многу контраверзии предизвика вакцината против ХПВ, која веќе седум години е на листата на задолжителни вакцини, а имаше најава за казни за родителите кои нема да ги вакцинираат девојчињата. Според анализите на Институтот за јавно здравје оваа вакцинација од година во година бележи се поголем пад и има најмал опфат од сите вакцини во имунолошкиот календар. Родители на свој ризик одбиваат да ги вакцинираат своите деца поради многуте несакани реакции од оваа вакцина во светот.
Инаку, Македонија е една од трите земји во светот кои први ја воведоа оваа исклучително скапа вакцина иако клиничките испитувања за бенефитот од вакцинацијата не беа завршени. Образложението на тогашните здравствени власти, во време на екс министерот Бујар Османи беше дека така ќе се превенира ракот на грлото на матката.