Лина Ѓорческа и оваа година го заврши настапот во квалификациите за Ју-Ес опен уште во првото коло. Австралијката Дестини Ајава, 152 на ВТА листата, овојпат беше подобра од 23 годишната тетовка со 4:6, 6:4, 6:3 во меч што траеше речиси час ипол.
Најдобрата македонска тенисерка одлично почна. Еден брејк во воведниот сет што го направи во петтиот гем ѝ беше доволен за водство со 1:0 по 27 минути игра.
Во ист стил го почна и наредниот, овојпат со брејк веќе во првиот гем за потоа и да го потврди за 2:0. И кога се чинеше дека Ѓорческа се наоѓа пред рутинско приведување на мечот до крај, Ајава возврати со два брејка и со серија од 5:1 стигна до 6:4 за израмнување и вовед во решавачки сет. Моментот на одлука се случи во четвртиот гем. Австралијката направи трет брејк за 3:1 и повеќе не дозволи да биде загрозена.
Ѓорческа и Ајава одиграа натпревар со израмнети статистички показатели. Македонската тенисерка сервираше еден ас повеќе (9-8) и имаше и еден директен поен повеќе (9-8). Двете направија идентичен број двојни сервис грешки (3-3) и неизнудени грешки (3-3).
Нијансата што на крајот натежна на страна на Австралијката беше првиот сервис. Ѓорческа беше прецизна 44 пати од 73 обиди (60 отсто) за разлика од 54 добри топчиња на Ајава од 78 обиди (69 отсто). Речиси исто беше и во однос на освоените поени по прв сервис. Ѓорческа запиша 32 наспроти 43. на тинејџерката од Мелбурн.
Ѓорческа на Флешинг Медоу дебитира лани кога, исто така, беше поразена на стартот од Американката Катрин Белис со 0:6, 2:6.