Гинекологот Никола Дамчевски на сопружници од Кавадарци им ветувал дека може да направи да добијат машко бебе и за тоа им земал 5000 евра. Станува збор за Јасмина А. која е уште една жртва на гинекологот кој девет месеци манипулирал и лажел пациентка дека е бремена. Истиот гинеколог успеал два месеца да ја лаже Јасмина дека е бремена при што и давал непотребни лекарства иако жената веќе имала две деца и можела да забремени по природен пат.
Приказната започнала при нивната прва средба кога жената која веќе била во осмиот месец на бременоста отишла во една приватна болница каде што првично работел гинекологот Дамчевски. Таму имала закажано снимање на 4 Д ЕХО за да го види детално бебето, да не има некакви аномалии бидејќи во Кавадарци немало таков апарат. Носела женско бебе, а веќе имале една ќерка. При прегледот Дамчевски и рекол доколку сакаат машко дете, за трето да го бараат бидејќи постои метода со која може да го направи тоа. Во 2011 година сопружниците за да не ризикуваат по трет пат да добијат женско бебе, одлучиле да одат во болницата „Св. Лазар“ каде што се префрлил да работи гинекологот. Отишле во надеж дека постои начин како да добијат машко бебе.
„Гинекологот Дамчевски ни објасни дека тоа ќе го постигне со некаква ПЏД технологија, некаква нова метода. Под дејство на целосна анестезија ми извади јајце клетки и така оплодени со спермата од сопругот рече дека ќе ги прати во Бугарија каде ќе се испита кој е машкиот ембрион за да го врати назад и така да зачнам со машко бебе. По две недели чекање, наводно одбраниот ембрион го врати во матката. За цело време, за секое испитување и снимање ни земаше дополнителни средства, а за самата процедурата плативме 5000 евра. За тоа добивме само една сметкопотврда, не и фискална сметка „ја започна својата приказна за НОВА, оваа кавадарчанка.
Веднаш и кажал дека е бремена и таа започнала да оди на контроли кај него. Јасмина тврди дека за цело време добивала непотребни лекарства, хормонална терпија, инјекции против коагулација на крвта. На секој преглед на ЕХО и пуштал да слуша срцев ритам на бебето, ги мерел димензиите на плодот.
Јасмина вели дека кога почнала да крвари му се јавила, а тој и рекол никако да не оди на друга лекар, туку да дојде право кај него за да и даде лекови.
„Кога отидов ми стави инфузија во која се сомневам дека воопшто имаше некаков лек бидејќи крварењето не престана. Јас уште веднаш отидов во болницата во Кавадарци каде што ме прегледа гинекологот кој ми соопшти дека не сум бремена. Тоа беше шок. Отидов на уште еден приватен гинеколог и тој ми потврди дека не сум воопшто бремена. Му се јавив на Дамчевски, а тој ме убедуваше на никого да не верувам“, рече Јасмина А.
Оваа жена вели дека после тоа докторот Дамчевски одбегнувал да се сретнат, многу пати не одговарал на телефонските повици. Еден ден сопружниците отишле ненајавено и го прашале што е ова, покажувајќи му ја ЕХО снимката направена кај друг гинеколог, на која се гледало дека Јасмина не е бремена.
„Тој ми рече дека не се развил плод, едноставно се исушил и дека тоа се случува во медицината. Кога виде колку сум револтирана ми даде празен лист хартија и ми рече да се потпишам на него. Не знам зошто го стори тоа, дали сакаше да ми го злоупотреби потписот, но јас не ставив свој потпис таму. Но, она што можам да кажам е дека Ин витро постапката во ова болница не личеше на ништо. Ние не знаеме колку јајце клетки извадил од мене и каде се,ниту пак, каде завршил материјалот од мојот сопруг. Тоа е многу страшно“, изјави Јасмина.
Јасмина сега е мајка на три деца, две девојчиња и трето машко кое го добила по природен пат. Вели дека кога ја слушнала приказната на НОВА многу се вознемирила бидејќи како што вели„кога мене ми беше многу тешко што веќе имав две деца, како им било на другите жени кои се бореле со стерилитет“. Таа својата приказна ја раскажа, за како што рече, да не страдаат други жени и да се стави крај на манипулациите од овој лекар.
Во меѓувреме, случајот кој силно одекна во јавноста, не допре до директорката на Клиниката за гинекологија. Марија Хаџи Лега. Таа и денеска не одговори на телефонските повици и на СМС пораките на НОВА. За друг медиум вчера објаснила дека гинекологот такво нешто нема направено на Клиниката за гинекологија каде што работи од септември минатата година, на одделот за Ин витро фертилизација.
Од ОЈО велат дека се води истрага по поднесената кривична пријава од страна на сопружниците кои го обелоденија скандалот, за сторени кривични дела Тешки дела против здравјето на луѓето, Измама и Фалсификување на исправа за што јавен обвинител ги прибавил сите материјални докази и медицинска документација. На испитување бил повикан осомничениот лекар, оштетените, како други сведоци, така што се очекува донесување на одлука. На прашањето на НОВА дали против истиот осомничен лекар се поднесени други пријави, од обвинителството одговорија дека ова е единствена, но доколку се пронајдат нови докази и се јават други оштетени, може да се отвори нова истрага.