На настанот за одбележување на годишнината од „пучот“ во Турција кој ќе се одржи во Скопје, ќе присуствуваат официјални претставници на Владата. Ваков одговор добивме од портпаролот на Владата, Миле Бошњаковски на прашањето дали премиерот Зоран Заев ќе присуствува на одбележувањето на годишнината од пучот во Турција.
Портпаролот не сакаше да потврди дали премиерот ќе биде еден од претставниците на Владата на овој настан
Турската амбасадорка Тулин Еркал Кара денеска рече дека Анкара со новата Влада имала добра соработка и од новата влада го очекуваат истото и ќе побараат да се исполнат барањата на Турција за затварање на организациите во Македонија зад кои според Анкара стои Фетула Ѓулен.
Турската амбасада во Скопје најави серија на манифестации во земјава со што ќе се одбележи годишнината од неуспешниот државен удар во Турција.
Таа рече дека тоа што премиерот Зоран Заев и други државни раководители прифатиле да присуствува на одбележувањето на годишнина од пучот и претставува особено задоволство.
Ердоган е обвинет од речиси сиот модерен политички и граѓански свет дека под превезот на контроверзнот пуч тој спроведе чистка на неистомислениците и воведе формална диктатура. Со измени во уставот на претседателот му е овозможено да издава декрети. Стотици илјади граѓани од кои сите критичари на Ердоган се прогонувани, истражувани, апсени, затворани, отпуштани и исчезнати, а во земјата не постои слобода на говор.