Од:

Семејството Кочан ги напушта менаџерските позиции во своите компании

Сопругата на осомничениот бизнисмен Сеад Кочан, Асмира Кочан, се повлече од менаџерската позиција во фирмата „Трансмет лаб ДООЕЛ“, фирма ќерка на компанијата „Трансмет ДОО“. Денеска во централниот регистер е впишан промената во раководството во компанијата и тоа само неколку дена откако нејзиниот сопруг излезе од државата додека по него е распишана потерница за притвор. Нов директор на местото со Асмира Кочан во „Трансмет лаб“ е Селма Кочан, помлад член на фамилијата Кочан. НОВАТВ при проверка во центарлниот регистер забележа дека Асмира Кочан е повлечена и од директорската позиција во телевизијата НОВА. Тоа го сторила минатата година, а периодот коинцидира со почетокот на предистражните дејствија за „Трансмет“ од страна на Специјалното јавно обвинителство.

Фирмата „Трансмет лаб ДООЕЛ“ е фирма ќерка на главната фирма „Трансмет ДОО“, која во моментов е под истрага на Специјалното јавно обвинителство. И двете се наоѓаат на иста адреса во Т.Ц. Зебра во Капиштец.

Во едно интервју на Асмира Кочан пред една година, таа со гордост раскажува за успесите на „Трансмет“ и за поддршката од нејзиниот сопруг, Сеад Кочан.

„Од година во година друштвото, полека но сигурно, се градеше и ја заземаше позицијата на компанија што е препознатлива според својот квалитет, исполнителност и навремено услужување на своите клиенти. Нашето мото „Ние го обновуваме минатото, ние ја градиме иднината“ стана реална потреба за сите нас“, вели во интервјуто Асмира Кочан.

Овие промени доаѓаат откако на Сеад Кочан, првосомничен во случајот „Труст“ на СЈО, му беше одредена мерка притвор. Кочан се сомничи за злоупотреба на службената положба во 2012 година кога бил управител на „Трансмет ДОО“ и со лажни документи добил тендер од ЕЛЕМ во вредност од 17 милиони евра. Кочан не е достапен на органите на прогонот и МВР за него распиша меѓународна потерница. Неговиот адвокат тврди дека Сеад Кочан не е во бегство, туку е на службен пат, а притворот е незаконски.

Сеад Кочан по отворањето на Телевизијата НОВА излезе од менаџерската позиција на „Трансмет ДОО“, која му ја препушти на неговиот брат, Дин Кочан. Сеад Кочан, според документите од Централниот регистар, се уште е сопственик на телевизијата. Тројцата браќа Кочан (види фото) ја наследија компанијата од нивниот татко Исмет Кочан.

Од лево кон десно: Сеад, Дин и Сеид Кочан



Comments are closed.