Партијата ВМРО-ДПМНЕ вечерва преку соопштение јавно праша кој тоа им се заканувал на амбасадорите, како реакција на осудувањата кои денеска дојдова од Европската комисија на повиците за линч на амбасадори.
Споделувајќи ја загриженоста на Европската Комисија ВМРО-ДПМНЕ јавно прашува кој и како им се заканувал на меѓународните преставници во Република Македонија и да се посочи конкретен пример за тоа.
ВМРО-ДПМНЕ осудува говор на омраза и повици за насилство, и тоа треба да го направат и сите останати политички чинители. Споделувајќи ги демократските вредности очекуваме допрецизирање и појаснување за таквите наводи со цел надлежните институциите поефикасно да превенираат такви случаи.
Европската комисија денеска се огласи и рече дека цврсто ја осудува секоја запаллива и опасна реторика, „вклучувајќи и таргетирање на претставниците на меѓународната заедница во Скопје“. Според неа, таквата реторика „ја движи земјата уште подалеку од евроатлантскиот пат, кој нејзините граѓани го сакаат и заслужуваат“.
Амбиентот на говор на омраза и повици за отстранување на дел од амбасадорите од земјите на ЕУ и НАТО кои беа вклучени во изнаоѓања решенија за политичката криза во земјава повеќе од две години е присутен на социјалните мрежи и во дел од провладините медиуми, особено порталите. Но по предвремените парламентарни избори за време на протестите на поддржувачите на ВМРО-ДПМНЕ кои се случуваа изминатите неколку дена, атмосферата на омраза кон странските претставници во земјава ја „зовреа“ и функционери на оваа партија.
Од говор пред Државната изборна комисија (ДИК), прв на амбасадорот на САД, Џес Бејли, во четвртокот навечер минатата недела суптилно му се закани директорот на Државниот архив Филип Петровски. Состојбите кулминираа завчера со донесениот проглас на Извршниот комитет на ВМРО – ДПМНЕ којшто беше читан од страна на претседателот Никола Груевски пред насобраната толпа во којшто тој директно им се обрати на странските амбасадори во говор кој беше оценет како заплашувачки.