Од:

Никола Попоски во напад на медиумите и граѓанските организации

ВМРО-ДПМНЕ денеска преку соопштение и преку интервју на министерот за надворешни работи Никола Попоски, повторно се закани на медиумите и невладините организации кои се финансирани од Фондацијата отворено општество.

Во соопштението кое го испрати партијата, се вели дека процесот на десороизација започнува. Во исто време, во интервју кое сабајлево го пренесе порталот „Телеграф.мк“, во кое министерот Попоски за италијанскиот весник „Ла верита“ вели дека со финансирање на граѓанскиот сектор, Сорос прави притисоци и дестабилизација на државата.

Ниту во соопштението на ВМРО-ДПМНЕ, ниту пак во интервјуто на Попоски не се споменуваат парите кои Сорос ги дал на владата во која премиер беше Никола Груевски, лидерот на ВМРО-ДПМНЕ.

Од ВМРО-ДПМНЕ велат дека, СДСМ и Сорос се посветени на мисијата за уништување на демократијата преку директен и брутален напад на секоја мисла различна од нивната матрица.

„СДСМ и Сорос преку истурање грантови системски ги корумпираат новинарите и медиумите, создавајќи од нив полукорисни роботи кои без приговори ги извршуваат задачите кои им се даваат. СДСМ и Сорос се гробари на т.н. граѓански сектор создавајќи мрежа на марионетски невладини организации кои се слепи послушници на наредбите кои ги добиваат со цел креирање тензии и зголемување на влијанието на Сорос во државата. Народот одлучи: процесот на десоросоизација отпочнува“, пишува во соопштението на ВМРО-ДПМНЕ.

Во интервјуто на Попоски, тој посочува дека лобито на Сорос финансирало македонски невладини организации и на тој начин правело притисоци врз македонската јавност.

„Отворено општество финансира субјекти коишто на нетранспарентен начин се занимаваат со политика, а тоа е неприфатливо за нас. Всушност, од овие субјекти произлегуваат медиумските притисоци и несоодветните влијанија врз јавното мислење.  Но, од нив пред сè започнуваат политички битки, коишто како по некоја наводна  случајност, секогаш вршат притисок во еден правец. Секогаш во корист на социјалистичката коалиција. Тоа според нас е дестабилизација“, вели Попоски.

Инаку Фондацијата Отворено Општество во Македонија вложила 145 милиони долари. За образованието донирала 32 милиони долари а во здравството 13, 5 милиони долари. 800.000 добило Министерството за труд и социјална политика.



Comments are closed.