Во АРМ од денеска почнаа со работа 125 нови професионални војници, од вкупно 375 колку што ќе бидат нововработени до крајот на годинава.
„Како војници треба да бидете горди што ќе бидете првата генерација која ќе служи на својата земја како земја членка на НАТО, рече премиерот Зоран Заев.
„Нашето членство во сојузот за вас ќе отвори поголеми можности. Македонската армија со години наназад рамо до рамо со војските членки на НАТО учествува во мировните мисии и добива највисоки оценки. Со учеството во тие мисии растеа и капацитетите на АРМ. Министерството за одбрана и Владата на РМ заеднички работеа напорно за да го вратиме дигнитетот на вашата професија, а минатата година се соочивме со поразителна состојба после застојот во реформите. Но го прифативме предизвикот и за само една година нашата земја го постигна она што никој не можеше да го предвиди – рече Заев.
„Вие сте првата група од вкупно предвидените 375 нови професионални војници кои годинава треба да го зајакнат составот на АРМ. Сакам да ви кажам дека вие ја започнувате вашата кариера во вистинско, крунско време. Време на големи предизвици, модернизација и професионализација на армија. Време во кое Македонија ќе ја унапредува одбраната и ќе го достигне стандардот на Алијансата, рече министерката за одбрана Радмила Шекеринска.
Тој додаде дека Владата почнала со зголемување на Буџетот за одбрана и дека обезбедува доволно средства што ќе ги задоволат сите потреби на една современа армија, а најави и реформи кои, како што рече, ќе се почуствуваат многу брзо.