Седмо од осумте сценарија за Северна Македонија во 2023 година. Сите сценарија се засновани на лични перцепции и проценки, НЕ се врз основа на конкретни изјави и сознанија.
ЏАБИР ДЕРАЛА
Линк до СЦЕНАРИО 1/8 | Линк до СЦЕНАРИО 2/8 | Линк до СЦЕНАРИО 3/8 | Линк до СЦЕНАРИО 4/8 | Линк до СЦЕНАРИО 5/8 | Линк до СЦЕНАРИО 6/8
Руската и српската пропаганда од надвор и ултранационалистичката пропаганда од внатре, се интензивираат во 2023. Опозицијата организира протести на кои бара предвремени парламентарни избори. Во текот на летото има серија шумски пожари кои предизвикуваат огромни човечки и материјални штети, а опозицијата, по обичај, одговорноста ја префрла на власта.
БОРБА ЗА ПОЗИЦИИ
Истовремено со бранот протести, се разгоруваат внатрешните расправии и борбата за позиции во сите политички партии. Но за тоа не е потребно посебно прогнозирање…
КОНФЛИКТ И ПОМИРУВАЊЕ
Конфликтот меѓу актуелниот и поранешниот лидер, Ковачевски и Заев се интензивира и трае речиси половина година.
Сепак, соочени со растечкиот број предизвици на политички, економски и безбедносен план, двајцата маркантни лидери си подаваат рака и решаваат да ги остават разликите на страна и да се фокусираат на иднината, секој од своја позиција, Ковачевски како премиер и лидер на СДСМ, Заев како јавна личност и филантроп.
Ова помирување испраќа силен позитивен сигнал во јавноста. Мислењето дека само со дијалог и со посветена работа може да се надминат сите проблеми почнува да преовладува.
САНАЦИЈА
Владата на Ковачевски успева да собере сили и, по лошата прва половина од годината, започнува со санирање на состојбите. Со низа социјални и економски пакет мерки, тимот на Ковачевски успева да го сочува социјалниот мир и економската стабилност во земјата. Во втората половина од годината, рејтинот на СДСМ и коалицијата на власт расте. „Неутралните“ медиуми и НВО излегуваат со изјави дека рејтинзите се наместени. Но возот кон Европа добива нова енергија.
РЕКОНСТРУКЦИЈА И АПСЕЊА
Владата на Ковачевски доживува мини реконструкција. Меѓу министрите со кои се поздравува Ковачевски се (нема да откриеме сега). Владата на Ковачевски, веднаш по реконструкцијата, се зафаќа со две големи и важни реформи: правосудството и изборниот систем. И двете реформи ги прават предвремените избори невозможни.
Паралелно со интензивирањето на правосудните реформи се случуваат неколку апсења на големи судски и обвинителски ѕверки. Конечно, се покренуваат и неколку истраги за сериозни криминали за политичари, меѓу другите, и против Мицкоски и Апасиев. Започнуваат и неколку судења за висока корупција и организиран криминал.
ПОСЛЕДНИ ОБИДИ НА ОПОЗИЦИЈАТА
Опозицијата дава сѐ од себе да ги интензивира протестите. Се организираат неколку протести со насилни инциденти и се прават обиди да се предизвика меѓуетничко насилство. Но, како и во јули 2022 година, протестите „умираат“, а остануваат само 6-7 видно пијани ликови пред Собрание и исто толку пред Владата.
Во пресрет на новогодишната ноќ на премин од 2023 во 2024 година, дежурниот новинар на дескот на ЦивилМедиа твитнува: „Земјата се извлече од пропаст на евроатлантската агенда. За влакно. Со среќа во 2024 година.“