Специјалната јавна обвинителка Катица Јанева доби 30 дневен притвор во Истражниот затвор во Шутка, но сепак ќе и биде дозволено да присуствува на погребот на нејзината мајка утре во Гевгелија.
Јанева денеска беше приведена и спроведена во Кривичниот суд, каде што попладнево и се слоши, па интервенираше екипа на Брзата помош. Доцна вечерва таа беше спроведена во Шутка.
Таа вчера беше на неколкучасовен распит во Обвинителството за организиран криминал во врска со случајот „Рекет“.
Јанева има право на жалба за определена мерка притвор во следните два дена пред Кривичниот совет.
Русковска: Истрагата за „Рекет“ останува е отворена
Обвинителката Вилма Русковска вечерва на прес конференција пред Кривичниот суд изјави дека нема други осомничени во случајот „Рекет“, но нагласи дека истрагата е се уште отворена.
Таа потврди дека постои судир на интереси поради тоа што Павлески е адвокат на Јанева, а тој е и адвокат на Цветан Панделевски осомничен во предметот на СЈО „Империја“. Додаде дека на нејзино барање канцеларијата на Павлески презела обврска да ги откаже полномоштвата за другите осомничени во други предмети на СЈО.
Во врска со вчерашното сослушување на Јанева таа рече дека Јанева не била во својство на сведок, како то рече самата Јанева, туку како лице кое има информации. Негираше дека тоа што поминало подолго време од отворањето на истрагата за „Рект“ и апсењето на двајцата осомничени Јовановски и Милески, до апсењето на Јанева, ќе влијае на доказите во истрагата.
Таа потврди дека биле бришени податоци од неколку компјутери кои биле користени од стручните соработници на СЈО, но рече дека ниту еден од компјутерите на обвинителите не бил форматиран.
Павлески: Изненаден сум од одлуката на Обвинителството
Пред почетокот на распитот во Кривичниот суд, адвокатот на Јанева Стеван Павлески кажа дека е изненаден од денешната одлука на Обвинителството за организиран криминал и корупција да ја прошири истрагата за „Рекет“ и со Јанева и да се бара притвор за неа.
„Јанева е човекот кој гледаше либерално на притворот. Таа е единствената која дозволуваше куќен притвор, враќање на патните исправи. Погледнете ги одлуките на Одделението за организиран криминал – тие немаа такво искуство, но ете тоа некој и го зема за зло. Таа е жртва во случајот и ќе го докажеме тоа“, рече Павлески.