Според годинешниот Атлас на контрацепција, кој ја оценува достапноста на модерните средства за контрацепција во 46 европски земји, 43 отсто од бременостите во Европа се непланирани.
Во Македонија пристапноста и информираноста за модерните контрацептивни средства се далеку од доволни, а трошоците за кое било од нив не се ни делумно покриени од Фондот за здравствено осигурување, стои во извештајот на невладината организација ХЕРА, објавен на нивната веб-страница.
Во извештајот на Атласот за контрацепција за 2018 година се наведува дека пристапот до контрацепција треба да биде клучна грижа на владите во зајакнувањето свесноста на граѓаните за планирање на нивните семејства и животи.
Наодите покажуваат дека за многу европски земји, обезбедувањето на луѓето да имаат избор за нивниот репродуктивен живот, не е приоритет. Сега, во своето второ издание, Атласот ги следи владините политики за пристап до методи за контрацепција, советување за планирање на семејството и обезбедување на онлајн информации за контрацепција во 46 европски држави.
-Доколку официјалните владини веб-страници имаат информации за типот на контрацепција и каде може да се набави претставува минимален трошок за владите, но им помага граѓаните кои бараат точни информации. Севкупно, подобрување на квалитетот на достапните онлајн информации од објавувањето на Атлас во 2017 година постои, но сепак само 11 од анкетираните земји имаат многу добри или одлични веб-страници поддржани од владата, стои во извештајот на Атласот на контрацепција.
Белгија, Франција и Велика Британија се рангираат најдобро од 46-те анкетирани земји.
Македонија не е дел од земјите опфатени во истражувањето на Атласот за контрацепција.