Балони со разни бои вечерва се фрлаа врз седиштето на градската администрација и Кабинетот на градоначалникот на Скопје Коце Трајановски, а низ скопските улици и тараби со шаблон се испишуваат графити „#Шарена револуција“ . Додека државата не застане на „свои нозе“, додека сите оние кои се огрешиле пред Законот не одговараат, протестите во Македонија нема да стивнаат без разлика и на тоа дали ќе има преговори неделава во Виена, порачаа демонстрантите на денешниот – деветти по ред протест во Скопје по одлуката на Иванов за колективна аболиција на политичарите.
Со сплотени македонски и албански знамиња, транспаренти со ликот на обвинителката Фатиме Фетаи и свирежи, демонстрантите традиционално протестот го започнаа пред Специјалното јавно обвинителство (СЈО).
Како што демонстрантите се движеа кон Собранието, така сè повеќе се засилуваше скандирањето со „Нема правда, нема мир“. По пат, поминувајќи покрај Министерството за правда и Народната канцеларија на претседателот, граѓаните на разглас ја повикуваа полицијата да им се приклучи.
Иако Собранеито беше под засилено полцииско обезбедување, пристапот на улицата беше слободен за протест.. Отспротива, сè уште стоеа боите врз Триумфалната порта која на изминатите протести беше исшарана од демонстрантите.
-Нè напаѓаат зошто ја бојадисуваме Триумфалната порта, а они не се свесни дека потрошија 4,4 милиони евра за неа… поради сиве овие суми од проектот Скопје 2014 ние немаме леб, немаме пари и кога ќе не прашаат зошто протестираме, ние имаме едно да им кажеме – ЗА СЛОБОДА! Секогаш се прашував зошто претседателот Иванов никогаш не излегува јавно и не зборува, но после овие негови гафови сфатив дека најпаметно е за него никогаш да не излезе повеќе и засекогаш да молчи. Овде не делиме сендвичи, не делиме пијалоци, туку делиме, мир, слобода, достоинство и чест, рече студентот Рашо Радулов.
Од Собранието, демонстрантите преку плоштадот Македонија се упатија кон Владата, а оттаму протестот заврши пред бараките на Град Скопје.
Демонстрантите обединети под граѓанската палтформа #Протестирам бараат итно повлекување на одлуката за аболиција на сите оние против кои се води истрага и е покренато обвинение од Специјалното обвинителство. Се бара итна и неотповиклива оставка на Иванов од функцијата претседател на Република Македонија, произнесување на Уставниот суд за уставноста на Специјалното јавно обвинителство, како и формирање на специјално одделение во Кривичниот суд за случаите на СЈО.
Дел до барањата исто така се и итно повлекување на одлуката за одржување на парламентарни избори на 5. јуни, задолжително присуство на претставници на граѓанското општество во процесот на решавање на кризата. Тие сметаат дека процесот на решавање на кризата треба да се одвива на територијата на Македонија и тоа сè додека не се формира преодна Влада која ќе ги имплементира реформските приоритети од Извештајот на Прибе.
-До исполнувањето на нашите барања нашата политичка борба останува на улиците, нема правда нема мир, порачаа демонстрантите.
Освен во Скопје, протести денеска се одржаа и во Прилеп, Велес, Штип, Струмица, Охрид, Кавадарци и Кочани.