Покачување на пензиите, платите, субвенции, враќање на парите, еднаквост, фискална амнестија ветуваа политичките партии на денешните митинзи.
Лидерот на ВМРО-ДПМНЕ, Никола Груевски од митинзите во Неготино и Кавадарци на граѓаните им вети дополнителни субвенции и откуп на грозје и ја искористи шансата да го нападне својот противник од опозициската СДСМ. Тој се обрати до неопределените гласачи и ги праша дали повеќе му веруваат нему или пак на Зоран Заев.
Заев, во Демир Хисар, презентирајќи ја предизборната програма „За живот во Македонија“ рече дека нивната цел е да го вратат животот во Македонија преку враќање на парите кон граѓаните, но и преку враќање на слободата на демократијата и на правдата.
Павле Трајанов и Јове Кекеновски, носители на листите за пратеници од Коалицијата за промени и правда денеска разговараа со граѓаните во повеќе населби во Скопје. Тие нагласија дека за излез од кризата, неопходни се промени.
Тие на граѓаните им ветија еднакви услови за бизнис на домашни и странски компании, поддршка на компании кои градат фабрики и најниска плата од 300 евра. Повеќе пари за образование, здравствена заштита, но, и за гасификација, изградба на надвозници и подвозници во Скопје .
Од Коалицијата ВМРО за Македонија ветија дека токму тие ќе одлучуваат за новата влада. Љубчо Георгиевски изјави дека жали, што ВМРО-НП, Достоинство и Обединети за Македонија не се соединиле досега, затоа што анализите покажувале дека можат да освојат најмалку десет пратеника во Собранието.
Демократската партија на Албанците на жителите во Челопек, Тетово им ветија дека ќе ги решат сите проблеми на Албанците во Македонија. Лидерот на ДПА, Мендух Тачи вети дека со формирање на парламентарниот состав ќе предложат да се донесе закон за фискална амнестија или бришење на сите долгови што ги имаат Албанците кон државата.
Од ДУИ пак, најавија, дека сите граѓани на Македонија треба да се помират со тоа дека двојазичност ќе има и да го научат Албанскиот јазик.