Екипата на ПСЖ не беше единствена „жртва“ во спектакуларниот триумф (6:1) на Барселона во осминафиналето во Лигата на шампиони. Во историскиот пресврт на Каталонците „настрадаа“ и обложувалниците во Велика Британија кои признаа дека морале да исплатат големи суми на пари.
„Исплативме шестоцифрена сума на добивки. Тоа беше лош ден за нас“, порачаа од „Ледброукс“, еден од најголемите синџири на британски обложувалници. Притоа истакнаа дека слични износи за последен пат искеширале пред 12 години кога Ливерпул ги анулира оние 0:3 на Милан од полувреме во финалето во Истанбул.
Во „Ледброукс“ истакнаа дека најголеми квоти исплатиле на тројца онлајн клиенти. Во моментот кога Кавани намали на 3:1, тие уплатиле големи износи дека Барселона, сепак, ќе биде четвртфиналист во ЛШ. Понудената опција во тој момент била во сооднос 1:100, а домашните во последните седум минути постигнаа три гола и го исфрлија францускиот тим од елитната конкуренција.
Обложувалниците во Велика Британија не излегуваат со конкретни бројки за исплата на добивки од синоќешниот меч. Покрај „Ледброукс“ ќесето морале да го одврзат и во „Вилијам Хил“ иако само седум отсто од обложувачите типувале на минување на Каталонците во наредната фаза.