Десетина прилепчани пред два дена затропаа на вратата од домот во којшто живее пратеникот од СДСМ од Прилеп, Хари Локвенец, и му предадоа покана и знаме со барање да се приклучи на протестот на „Иницијативата за заедничка Македонија“. Тие се претставија како членови на македонското патриотско здружение „Пере Тошев“, а целата акција ја снимиле со мобилен телефон.
Им отвори малолетниот син на Локвенец кој им рече дека татко му не е дома и им ја затвори вратата, а тие поканата ја оставија пред станот. Водачот на групата, како што може да се види на видеото, носи блуза на којашто пишува „Македонија на Македонците“.
Пред да ја достават поканата, истите со разглас ја прочитаа пред зградата кај што живее Локвенец.
„Носиме важна покана до вашиот комшија. Почитуван господине Хари Локвенец. Ако се чувствувате како Македонец или ако има барем нешто малку македонско во вас, во вашето срце и душа ве покануваме на 7 март во 18 часот пред споменикот „Прилепски бранители“ да кажете НЕ за платформата и договори направени во други држави. НЕ за промена на знаме, име и јазик. Почитуван Хари Локвенец те повикуваме да ни се придружиш на нашиот протест. Ќе ти доставиме и лично покана и едно македонско знаме кое можеш да го носиш на себе“, пишува во поканата на здружението „Пере Тошев“.
Локвенец за НОВАТВ објаснува дека во тој момент неговите малолетни деца биле сами дома, а за „гласниците“ вели дека се нечесници кои ги вознемириле неговите деца. Тоа не е патриотизам, вели пратеникот.
„Пред два дена нечесници дојдоа кај мене дома и ги вознемирија моите малолетни деца. Во исто време вие кои нему му верувате тој ги тера на криминал вашите малолетни деца, да ги напаѓаат и вознемируваат оние кои јавно се спротивставуваат на неговиот криминал и јавашлук. Тоа не е патриотизам, тоа е сеење на омраза, создавање на раздор, поттикнување на конфликт и нови поделби“, изјави Локвенец.
НОВАТВ откри кои се лицата кои му доставија покана на Локвенец. Дел од нив имаат дебели полициски досиеја и се осудени за тешки кривични дела, од насилство и кражби, до убиство. Еден од нив моментално е вработен во ЈКП „Водовод и канализација“ во Прилеп.
Изминатите денови, откако почнаа протестите на „Иницијативата за заедничка Македонија“ повеќе граѓани се вербално нападнати „во име на патриотизмот“, со напади дека се предавници, а сите овие акции си ги снимаат самите со мобилен и ги објавуваат на „Јутуб“.
Жртва на напад беше музичарот Златко Ориѓански, кого непознати лица го нарекуваа предавник и дека овозможува децата Македонци да учат албански јазик.
https://www.youtube.com/watch?v=rPvcgnbAHAg
Три лица пред неколку дена вербално го нападнаа и професорот на Правниот факултет, Љубомир Фрчковски, на кои тој им возврати.
Жртви на ваквите напади беа и новинарот на НОВАТВ, Борјан Јовановски, новинарот Бранко Тричковски, пратеничката Ивана Туфегџиќ, како и професорот Владимир Милчин
На вториот ден од протестите на „Иницијативата за заедничка Македонија“ беше нападната екипа на порталот А1он, а новинарот и снимателот завршија во болница. Еден од напаѓачите е идентификуван, а според информациите тој е вработен во Град Скопје.