Здружението на граѓани Легис и Првата детска амбасада во светот Меѓаши започнаа кампања за помош на бегалците кои се лоцирани во кампови на граничната зона на Турција со Сирија.
Еден дел од кампањата е насочен кон собирање финансиски средства од граѓаните/ките и од бизнис секторот, а другиот дел кон подигање на јавната свест, особено кај помладата генерација.
– Целта е да ја подигнеме свеста особено на помладите во воспитно образовните институции, децата, учениците за состојбата во која се наоѓаат нивните врсници од Сирија и воопшто бегалците, потребата од солидарност и помош на луѓето кои страдаат од војна. Зборуваме за луѓе, деца кои ги загубија своите домови и речиси сè што имаат.
За жал, поради актуелната општествено политичка состојба во која се наоѓа Република Македонија, особено состојбата на младите и децата, една од пораките која ја упатуваме е до лидерите на политичките партии, родителите, старателите, наставниците, здруженијата на граѓани: да НЕ дозволиме историјата на Република Македонија и земјите околу нас да ни се повтори. Потсетуваме на слични конфликти и војни во Босна и Херцеговина 1992-1995, во Косово 1999-2000 и конфликтот во Република Македонија во 2001. Гледаме што се случува со децата во Сирија. За нив организираме помош на солидарност со здружението Легис, за да им помогнеме! Да НЕ дозволиме утре тоа некој друг да го прави за децата од Македонија!, се вели во пораката.
Од обете организации потсетуваат дека граѓаните ќе можат да донираат парични средства онлајн, во кутиите подготвени и распоредени по френкфентните супер маркети, како и на жиро сметка која ќе биде дистрибуирана деновиве во дневните и неделните весници.
– Со собраните средства сакаме да пратиме заедничка симболична хуманитарна помош од граѓаните на Македонија до децата бегaлци од Сирија, се вели во соопштението.