Партијата на градоначалникот на Пустец, Едмонд Темелко и по четири дена се уште се нема произнесено за изјавата на Албанската пратеничка од Партијата за правда, интеграција и единство, која рече дека Македонија не постои и е „стара албанска покраина и се вика Илирида“.
НОВА стапи во контакт со генералниот секретар на партијата Македонска алијанса за европско интегрирање, Васил Стерјовски, кој на прашањето дали ја осудуваат изјавата на Месила Дода, одговори „Еве ја осудуваме сега. Ние секогаш сме реагирале“.
Кога го прашавме, зошто до сега не стигнало официјална реакција со осуда, ни рекоа да почекаме, по што ни спуштија слушалка и кога се обидовме повторно да ги добиеме, не ни одговараа на повиците.
Дода, неодамна при посета на Дебар, рече дека Албанците од Илирида треба да бараат целосни права.
„Ние сме подготвени да им помогнеме на нашите браќа Албанци од другата страна на границата. Нема да може ниту Иванов, Груевски или некој друг анти-Албанец да си игра со животите на тамошните Албанци и да ја претворат во европската Палестина. Албанците од Илирида треба да бараат целосни права доколку Заев се повлече и доколку претседателот што го потпиша крајот на својата држава не даде оставка, треба под итно да се соберат сеалбанските политички сили и да помогнат Илирида да одржи референдум за прогласување на самостојност“, рече пратеничката Дода.
Реакции на политичките партии
По нејзината изјава веднаш со реакција се јавија македонските партии ВМРО-ДПМНЕ и СДСМ, кои оценија дека нејзината изјава не оди во прилог на добрососедските односи.
„Ваквите јавни настапи одат во прилог само на оние кои креираат поделби и работат на поттикнување раздор и нетрпеливост, спротивно на европските вредности за коишто се заложуваме“, се наведува во соопштението од СДСМ.
Од ВМРО-ДПМНЕ пак, реагираа дека изјава на Дода била поради тоа што СДСМ ја отвориле „пандорината кутија“.
„Дода е последна во низата кои отворено застанаа против македонските национални интереси. Таа му порача на Заев дека доколку се повлече од тиранската платформа треба да се соберат сеалбанските политички сили за да се помогнат да се одржал референдум за Илирида. Тоа е цената на игрите на Заев со тиранската платформа која е спротивна на највисоките државни и национални интереси“, рече Лилјана Затуроска од ВМРО-ДПМНЕ.
Но изјавата на пратеничката од Партијата за правда, интеграција и единство наиде и на реакции и коментари на социјалните мрежи од неколку истакнати личности од албанска етничка припадност, а помеѓу нив и активистот Замир Мехмети како и сопругата на музичарот Бени Шаќири, кои велат нејзината изјава не е добронамерна и не е добредојдена.
„Да ја потсетам госпоѓата Дода дека во Македонија никој не гласал за неа и затоа нема право да зборува во име на Албанците во Македонија! Исто така, сакам да ја известам дека ние веќе одамна сме одлучиле каква држава сакаме, и дека нејзината реторика е страшно дебилна, поготово во време на политичка и меѓуетничка криза. Ја повикувам јавно да се извини за овој дипломатски скандал! Јас се оградувам од нејзината изјава и очекувам истото да го направат и сите лидери на албанските партии во Македонија“, порача Лиса Баута Шаќири преку Фејсбук.
Замир Мехмети пак оценува дека ваквата реторика на Дода оди во прилог само на лидерот на ВМРО-ДПМНЕ, Никола Груевски.
„Ако навистина се грижиш за Албанците во Македонија пратеничке Дода, би требало да знаеш дека твојата политичка реторика од пред некој ден не оди во полза на решавање на политичката криза, уште помалку им помага на Албанците. Му помага само на Груевски (кој го нарекувате антиалбанец) и на неговиот режим.
Албанците во Македонија го имаат изберено својот пат, а тоа е европска и граѓанска Македонија“, порача тој.