Македонија изутрина заминува за Лихтенштајн каде утревечер ќе игра со домашната селекција во квалификациите за Светското првенство догодина во Русија. По поразите од Албанија во Скадар (2:1), од Израел (1:2) и Италија (2:3) во Скопје и од Шпанија (4:0) во Гранада, националниот тим е во потрага по премиерна победа во групата Г.
Фудбалската репрезентација ќе пристигне во Вадуц како фаворит на гостувањето, улога што, сепак, ќе треба да ја потврди и на стадионот „Реинпарк“. Го знаат тоа играчите во чие име го потенцира капитенот Горан Пандев.
„Нема лесни натпревари и нема лесни противници. Не сакаме да зборуваме за кој било натпревар дека сме фаворити. Тоа треба да го докажеме на терен. Претстојното гостување може да донесе многу позитивни работи. Пред се враќање на самодовербата, а со неа и враќање на конкурентноста за што подобар пласман во квалификациската група. Мора да направиме се што е во наша моќ за победа против Лихтенштајн. Најважни за нас се трите бода“, изјави Горан Пандев.
Во истовреме со мечот во Лихтенштајн – Македонија (петок, 20.45 ч.) ќе се одиграат уште две средби во групата. Италија на „Ренцо Барбера“ на Сицилија ја пречекува Албанија, а Шпанија на „Ел Молињон“ во Хихон ќе биде домаќин на Израел.
„Азурите“ и „фуријата“ се без пораз по досегашните четири кола, Македонија и Лихтенштајн се без победа, три има Израел, а две Албанија.