Тројца разбојници вчера во Монте Карло ја ограбија златарата „Картие“, а потоа за да и го отргнат вниманието на полицијата, подметнаа пожар во тунел кој се користи во трка за „Формула 1“ и во најголемиот град во Монако имаше вистинска вонредна состојба.
Набрзо по грабежот еден од арамиите е уапсен и кај него е пронајден дел од пленот, додека по другите двајца се уште се трага, пренесуваат француските медиуми, кои напоменуваат дека во овој инцидент немало престрелка, ни повредени, ни заложници.
Сепак, некои светски медиуми јавија дека имало пукање и полицијата ранила еден од разбојниците.
Нападот е извршен околу 15.40 часот на плоштадот Казино, во центарот на луксузниот кварт Монте Карло, а туристите и купувачите цело попладне мораа да го поминат во казино или околните бутици.
Тој дел од градот веднаш беше блокиран од полицијата во обид да ги најдат разбојниците од кои најмалку еден бил вооружен, соопшти обвинителството.
Обвинителството додаде и дека другите двајца крадци кои избегаа ги чекал соучесник со автомобил, а подоцна полицијата го нашла автомобилот запален.
Вработените на златарата не биле повредени, но биле вознемирени и исплашени.
Локалните власти засега не прецизираат колкава е вредноста на пленот, како ни околностите за овој спектакуларен грабеж.
Познатата златара „Картие“ веќе еднаш беше ограбена на Азурната обала во мај 2015, неколку дена во очи на почетокот на филмскиот фестивал во Кан, кога крадците однеле накит и часовници во вредност од 17,5 милиони евра.
https://www.youtube.com/watch?v=SBUqFlN43Lk