Дени Блинд (55) доби отказ по враќањето од Софија каде Холандија, синоќа, загуби од Бугарија со 2:0 во квалификациите за Светското првенство во Русија во 2018 година. „Лалињата“ по поразот паднаа на четвртото место во групата А и западнаа во неприлика повторно да останат без учество на големо фудбалско натпреварување по ЕП 2016. Оттука и експресната одлука на холандскиот фудбалски сојуз (КНВБ) чии челници ја лоцираа вината во селекторот.
Забелешките за Блинд, меѓудругото, се однесуваат на определбата да заигра со 17 годишниот дефанзивец Матијс де Лигт кој има само неколку сениорски настапи за Ајакс. Тој беше директно задолжен за Спас Делев, двојниот стрелец за Бугарите на „Васил Левски“. Блинд по мечот наласи дека не помислува на оставка туку дека се фокусира на пријателскиот меч со Италија во вторник што, сепак, ќе мора да го гледа од трибините по реакцијата на Сојузот.
Поранешниот тренер на Ајакс ја презеде репрезентацијата на 1 јули во 2015 година и под негово водство Холандија, за првпат по 1984 година, не настапи на Европското првенство што лани се одржа во Франција. Уште по елиминацијата од завршниот турнир Блинд беше пред отказ, но „преживеа“ и доби нова цел – СП 2018. Меѓутоа во КНВБ не сакаат нов „луксуз“, па решија со време да стават крај на соработката додека не биде предоцна.
По пет одиграни натпревари во квалификациите за СП 2018, Холандија е четврта во А конкуренцијата со седум бода. Лидер е Франција со 13 пред Шведска со 10 и Бугарија со 9 бода.