При подготвувањето на новиот распоред на судиите од Кривичен суд, биле земени в предвид мислењата кои судиите сами ги кажале на седница која се одржала на 17 овој месец, соопштија од Кривичниот суд.
„При подготвувањето на распоредот се имаше во вид состојбата со движењето на предметите од сите области, заостатокот во одредени области и потребата од итност во постапувањето по некои видови предмети утврдена со законските рокови. Исто така, се имаше во вид и оптовареноста на секој судија поединечно со предмети како и досегашните забелешки и мислења од повисоките судски инстанци во врска со работата на судот“, пишува во соопштението на судот.
Како што информираат од Основниот суд Скопје 1, распоредот во писмена форма е доставен до секој судија кој може да достави приговор за неговото распоредување до Врховниот суд на РМ.
Новиот распоред на судиите во Кривичниот суд, вчера предизвика бурни реакции во јавноста. Стојанче Рибарев, новиот претседател судот, го стави поранешниот претседател Владимир Панчевски за шеф на целиот оддел за организиран криминал, претходна постапка, судења, а ќе го води и кривичниот совет, објави „Сведок“.
Предмети по новиот Закон за кривична постапка ќе судат, судиите Моника Бахчовановска, Софија Лаличиќ, Џанета Бектовиќ, Билјана Коцевска, Верка Костова Спасеска, Милка Васовска Ангеловска, Марин Станески, Весна Петровска Тагасовска, Даниела Алексоска , Душан Јосифов, Дијана Груевска Илиевска и Љубинка Башевска.
Според распоредот на Рибарев, негов заменик ќе биде судијката Славјанка Јанкоска, која има уште три месеци до пензионирање и во исто време, ќе биде шефица на одделот претходна постапка. Јанкоска јавноста ја памети по донесеното решение дека прислушуваните разговори не се доказ.