На пет години од убиството кај Смилковско Езеро, родителите на четворицата другари на возраст од 18 до 21 година денеска го посетија местото каде што нивните синови беа убиени.
И по пет години, вистината се уште ги мачи родителите, кои бараат правда бидејќи во јавноста има разни шпекулации што точно се случувало на Великичетврток 2012 година на езерото.
Александар Наќевски, Филип Славкосвски, Цветанчо Ацковски и Кире Трпковски од населбата Радишани и 45-годишниот Борче Стевковски од селото Црешово беа убиени со огнено оружје.
Обдукцијата покажа дека во нив е пукано од три типа оружје, бидејќи најдени биле чаури од три различни типа муниција.
Таткото на Александар, никогаш не помислил дека денот кога синот заминал по риба ќе биде последен пат кога го видел. Револтиран, тој од Зоран Заев бара прислушувани разговори кои би му ја разјасниле дилемата, вината за нејаснотиите ја посочува кај трите најголеми политички партии, а обвинителката Катица Јанева се надева дека што поскоро ќе ја истражи вистината.
– Политичките партии се пазарат со овој случај. Револтирани сме од Заев, а мислам дека во круг се испазарени ВМРО-ДПМНЕ, СДСМ, ДУИ да молчат за „Монструм“, сите ни ветуваа а еве молк. Апелираме кај Јанева да го преземе случајот, да се открие целиот случај…Кој знае какви трикови ќе направат за случајот, вели Наќевски.
Јанева, во септември минатата година додека пред пратениците го објаснуваше извештајот на СЈО, на прашањето од Рафиз Алити дали СЈО ќе ги преземе случаите „Монструм“ и „Сопот“, одговори дека тие се во предистражна постапка, но Советот на јавни обвинители не му дозволува на СЈО да ги разгледа, прогласувајќи го за ненадлежно.
Како што рече специјалната обвинителка тогаш, не може да добие ниту увид, а не надлежност над случајот.
Во случајот „Монструм“ доживотен затвор им е изречен на Алил Демири, Африм Исмаиловиќ, Агим Исмаиловиќ, Фејзи Азири, Хаки Азири и Сами Љута. За Демири и Исмаиловиќ кои беа осудени во отсуство, се уште се чека на екстрадиција од Косово.
Според македонското МВР, убиените отишле да ловат риба на Смилковско Езеро со автомобил околу 15 часот на 12 април 2012. Нивните тела биле пронајдени облиени со крв вечерта во 22:30 часот од други рибари. На истото место, подалеку од четирите тела било пронајдено телото и автомобилот на Борче Стефковски.
Увидот на местото на настанот траеше цела ноќ се до пладне на 13 април 2012 кога телата беа предадени на судските вештаци за обдукција.
По пресудите во „Монструм“ се одвиваа засилени протести кои се претопија во насилство, при што дојде до судир помеѓу демонстрантите и припадниците на ЕБР, која употреби солзавец и шок бомби во обид да ги смири немирите.