Антонио Тајани, претседател на Европскиот парламент денеска на „Твитер“ изрази загриженост во врска со идејата на турскиот претседател Реџеп Таип Ердоган за враќање на смртната казна во Турција.
– Многу сум загрижен од можноста за одржување референдум по прашањето за смртната казна во Турција. Тоа е црвена линија за ЕУ, напиша Тајани.
Во Турција вчера се одржа референдум за проширување на претседателските овластувања, на кој предложената уставна реформа ја поддржаа над 51 отсто од гласачите.
Опозицијата оспори 60 отсто од гласовите со образложение дека ливчињата немале печат.
Откако беа познати првичните резултати од гласањето, Ердоган повторно изјави синоќа дека планира да организира референдум и за враќање на егзекуцијата во турскиот кривичен закон.
Идејата за враќање на смртната казна беше актуелизирана по неуспешниот обид за државен удар во Турција во јули минатата година.
Very concerned about mention of possible #referendum on #deathpenalty in #Turkey. Red line for the #EuropeanUnion.
— EP President Tajani (@EP_President) April 17, 2017