Со бојктот на изборите на 18 јуни што го најавува албанската опозиција ќе биде спречена реформата на судството што Албанија мора да ја направи и сето тоа ќе ја оддалечи земјата од ЕУ.
Ова е заклучокот на средбата помеѓу германскиот министер за надворешни работи Зигмар Габриел кој се наоѓа во официјална посета на Тирана и неговиот албански колега Димитри Бушати.
“Знаеме дека има многу работа. Овде во Албанија треба да се направат реформи во судството. Зошто е тоа толку битно? Затоа што ако има нешто што прави разлика во Европа и во ЕУ е спроведувањето на законите и на Уставот. На крајот на овој пат треба гаранција дека луѓето во Европа се безбедни и не се предмет на игра на интереси”, изјави Габриел.
И холандскиот министер за надворешни работи Берт Коендерс е во посета на Албанија и очекува слободни избори и примена на реформите во судството.
“Важно е да има дијалог, слободни и фер избори”, рече Коендерс.
Но, во Албанија нема политички дијалог и тоа одамна и покрај тоа што двете партии се менуваат на власт од 1991 година.
Во Албанија ќе допатува и Германецот Дејвид Мекалистер, претседавач со Комисијата за надворешни работи на ЕП и член на демохристијанската Европска народна партија. Тој прифатил да биде олеснувач за излез од политичката криза во која западна Албанија откако опозицијата се закани дека ќе ги бојкотира изборите.
Десната опозиција со месеци го бојкотира Парламентот и протестира против судската реформа тврдејќи дека власта не им дозволува во неа да учествуваат.
Помеѓу двете најголеми партии во Албанија нема никаков дијалог. Опозицијата од Демократската партија на Љуљзим Баша тврдат дека власта на социјалистот Еди Рама е корумпирана. Тие го обвинуваат Рама дека не се бори против шверцот на дрога и дека е корумпиран.
На ова Рама одговара дека во периодот кога актуелната опозиција била на власт имало страшни злоупотреби “кога голем број луѓе со викендички и бизниси се криеја зад маската на сиромашни”, изјави Рама.
Засега албанската криза останува само во редовите на Демократската партија која инсталираше огромен шатор под прозорците на премиерот Рама и досега не успева да ја натера власта на оставка и отстапки.
Но ако протестите продолжат треба да се види дали партијата Социјалистичко движење за интеграција, чиј што шеф е Илир Мета, претседател на Парламентот, ќе ја поддржува и понатаму владината коалиција.