Требаше да биде спектакл, а понуди еднонасочен натпревар. Сан Антонио го понижи Хјустон со 114:75 во шестиот меч од полуфиналето во западната конференција и со вкупни 4:2 обезбеди финална серија против Голден Стејт во НБА плеј-офот.
Убедливата партија на „спарси“ е дотолку повредна ако се има предвид неиграњето на повредениот Тони Паркер, прв плејмејкер во тимот на Грег Попович, како и Леонард. Ѕвезда на вечерта во нивно отсуство беше Ламаркус Олдриџ со дабл-дабл ефект (34 поени и 12 скока).
Најсветла точка во најбледото издание на „ракетите“ во серијата беше Тревор Ариза, стрелец на 20 коша. Но, немаше никаква поддршка од соиграчите што особено изостана од Џејмс Харден кој беше непрепознатлив на теренот. Постигна 10 поени од кои само два од игра и предвреме го заврши настапот поради шест лични грешки.