Финалето во ракометниот Куп на Македонија во женска конкуренција беше далеку од сензација. Тимот на ЖРК Вардар ја оправда апсолутната фаворитска улога што ја има во домашната сцена во изминатите неколку сезони и преку во финалето Металург го освои петтиот трофеј во натпреварувањето.
Европскиот вицешампион го доби еднонасочниот натпревар во салата во Автокоманда со 45:19 (полувреме 21:10) без притоа да дозволи ниту најмала можност за изненадување. Резултатот сам по себе доволно говори за односот на силите на теренот иако „црвено-црните“ запишаа 11 ракометарки во протоколот.
Најефикасна вардарка беше Французинката Александра Лакрабер со 12 гола, седум постигна македонската репрезентаативка Сара Ристовска. Дабевска со четири погодоци беше лидер на стрелците во поразената екипа.
На пласманот во финалето на ЖРК Вардар претходеше и најубедлива победа во клупската историја. „Црвено-црните“ во полуфиналето триумфираа над Гевгелија со 40 гола разлика (56:16).
Покрај победничкиот пехар, вардарки со уште две индивидуални признанија. Александра Лакрабер е прогласена за најдобра ракометарка на завршниот турнир, Сара Ристовска со вкупно 24 гола е најдобар стрелец додека наградата за најдобар голман заврши за Матеја Серафимова од ЖРК Металург.