Published: Monday, May 22, 2017 20:27
По средбата на Али Ахмети од ДУИ и лидерот на СДСМ Зоран Заев во Тетово, албанската партија информира дека денес е разговарано за “форматот на процесот на формирање на новата реформска влада на Македонија и предностите на новото мнозинството во земјата”.
Заев по средбите истакна дека со лидерите на ДР – ДПА Зијадин Села и на ДУИ Али Ахмети преговорите влегле во фаза на поделба на ресорите. Според него многу е важно да има квалитетни и квалификувани кадри кои ќе ги управуваат министерствата. Но не беа објавени имиња на идните министри. Имињата кои неофицијално можат да се слушнат засега остануваат во доменот на шпекулации.
Заев додаде дека негова цел како мандатар е во владиниот кабинет да ги вклучи сите партии кои ги дадоа потписите за мандатот.
И дека условите кои што партиите на Албаниците ги навеле и кои се прифатливи и за него како мандатар се: интеграцијата во НАТО и во ЕУ, владеење на правото и правната држава, целосно спроведување на Охридскиот договор, консензуални одлуки и одговорност на Владата.
Лидерите на ДУИ и СДСМ се согласиле околу принципите за владеење. За нив приоритети се сериозни реформи во владеењето на правото во согласност со препораките на меѓународната заедница, интеграција на земјата во НАТО и во ЕУ, Охридскиот Договор и добрите меѓуетнички односи како и отворање на нови работни места и економскиот развој заедно со развојот на животниот стандард.
Според ДУИ “една од предностите на владеењето ќе биде непосредна интеграција во НАТО и започнувањето на преговорите за членство во ЕУ со што, страните се согласија за сериозен ангажман кон постигнување на оваа заедничка цел”.
