Илија Несторовски со стил ја заокружи дебитантската сезона во Серија А. Македонскиот репрезентативец беше стрелец за Палермо во победата на домашен терен над Емполи со 2:1 и ги одигра сите 90 минути, но тимот од „Ренцо Барбера“, сепак, не успеа да опстане во италијанската фудбалска елита и се сели во понизок натпреварувачки ранг.
Сицилијанската „30-ка“ финишира со 11 погодоци во 37 настапи за Палермо. Стартуваше во 34 од нив, во три влегуваше од клупата, во шест беше повлекуван од игра и притоа, според педантните статистичари на Апенините, одигра 3107 минути.
https://www.youtube.com/watch?v=eku-H5AJurg
Јувентус ја одбрани титулата во Серија А и заедно со Рома ќе игра во групната фаза во Лигата на шампиони (ЛШ) во сезоната 2017/18. Наполи го освои третото место и до ЛШ ќе мора преку квалификациите.
Сигурни италијански претставници во групите во Лига Европа се Аталанта и Лацио. Шанса да се придружи на екипите од Бергамо и Рим ќе има и Милан кој како шестопласиран на табелата ќе игра квалификациски двомеч.
Во Серија Б се селат Емполи, Палермо и Пескара. Нови калчолигаши се Спал и Верона, а за преостанатото празно место во елитниот ранг ќе разигруваат Карпи, Фросиноне, Беневенто и Перуџа.
Серија А, 38 коло
Резултати
Торино – Сасуоло 5:3
Палермо – Емполи 2:1
Интер – Удинезе 5:2
Фиорентина – Пескара 2:2
Кротоне – Лацио 3:1
Сампдорија – Наполи 2:4
Рома – Џенова 3:2
Калјари – Милан 2:1
Болоња – Јувентус 1:2
Аталанта – Киево 1:0
Табела: Јувентус 91, Рома 87, Наполи 86, Аталанта 72, Лацио 70, Милан 63, Интер 62, Фиорентина 60, Торино 53, Сампдорија 48, Калјари 47, Сасуоло 46, Удинезе 45, Киево 43, Болоња 41, Џенова 36, Кротоне 34, Емполи 32, Палермо 26, Пескара 18.