Кристијано Роналдо по вторпат стана татко. Португалската фудбалска ѕвезда го напушти кампот на националниот тим по елиминацијата од Чиле (0:3 на пенали) на Купот на конфедерации во Русија и замина во посета на сурогат мајката и двата нови наследника.
„Бев во репрезентацијата и, како и секогаш, играв со срце и душа иако знаев дека во меѓувреме на свет ми дојдоа двата нови сина. Фудбалски, за жал, не успеавме да ја исполниме целта, но убеден сум дека ќе продолжиме да носиме радост за Португалците. Среќен сум што за првпат ќе бидам со моите деца“, напиша Роналдо на својот Фејсбук профил и во два часот по полноќ по средноевропско време ја напушти репрезентацијата.
Португалската ТВ куќа „СИЦ“ уште на 10 јуни објави дека Кристијано Роналдо, со помош на сурогат мајка, станал татко на близнаци со таа разлика што тогаш се шпекулираше дека добил син и ќеркичка. Покрај нив, фудбалерот го има и Кристијано Роналдо Јуниор кој, исто така, е роден од сурогат мајка на 17 јуни во 2010 година во болница во Сан Диего.