Италијанската фудбалска легенда и „икона“ на Рома останува на „Олимпико“. Веста ја потврди и новиот тренер на „волчицата“, Еузебио ди Франческо, кој истакна дека долгогодишниот капитен на екипата во иднина ќе биде директор во клубот.
„Речиси сигурно Тоти ќе биде директор. Неодамна разговарав со него и среќен сум што ќе биде во моја близина. Тоа, секако, е привилегија. Ќе ми биде од голема помош“, рече Ди Франческо.
Тоти на крајот на минатата сезона го одигра последниот меч во дресот на римјаните. По мечот со Џенова на домашен терен имаше емотивно збогување со навивачите, соиграчите, клупската управа. Од тогаш се шпекулираше дека можеби ќе продолжи со настапи уште една година во американската МЛС или во Кина, но остана доследен на својата фудбалска љубов.
„Работата е единствен вистински одговор на прашање како Рома повторно да биде победничка екипа. Мора да се создаде добар тим на играчи, да придонесат и навивачите, но и сите во клубот. Мора да бидеме поврзани, не смееме да паднеме во тешки моменти“, додаде Ди Франческо ко беше дел од шампионската генерација на „волчицата“ која во сезоната 2000/01 го освои Скудетото.