Дејан Савичевиќ останува на чело на црногорскиот фудбал и во наредните четири години. Неговата кандидатура за нов четиригодишен претседателски мандат беше прифатена со акламација на денешното изборно Собрание на Фудбалскиот сојуз на Црна Гора (ФСЦГ) во Подгорица. Поранешниот репрезентативец на Југославија и фудбалер на Црвена звезда и на Милан е на функцијата од 2004 година и, според резултатите од најновото изјаснување на тамошните фудбалски делегати, ќе остане да ја извршува до 2021 година.
Савичевиќ пред највисокото тело на ФСЦГ, првенствено, најави силна заложба за подобрување на фудбалската инфраструктура во земјата во наредниот период, но и верба дека националниот тим би можел да биде сериозен кандидат во квалификациската група за пласман на Светското првенство во Русија во 2018 година.
„Извршувањето на оваа функција го доживувам како голема чест и обврска. Пред нас има голем број на обврски што мора да ги исполниме. Ваквата ваша поддршка ми дава поттик за напорна работа за просперитет на црногорскиот фудбал. Се надевам дека до крајот на овој мандат ќе можеме да кажеме дека имаме стадиони во Цетиње, во Тузи, во Беране“, порача старо-новиот претседател на ФСЦГ пред присутните делегати.
Собранието беше запознато и со финансиското работење на Сојузот во 2016 година што Црногорците ја завршиле со позитивно салдо од близу два милиона евра. Приходната страна во извештајот „тежи“ нешто над осум милиони, а расходната повеќе од шест.