Претседателот на Собранието, Талат Џафери, во денешното свое обраќање на Комисијата за европски прашања пред премиерот Зоран Заев и вицепремиерот Бујар Османи, кои беа присутни меѓу другите, потенцираше дека очекува конструктивност и од Владата и од опозицијата на патот кон евроатлантските интеграции на Македонија.
– Во „Планот 3-6-9“ кој што во суштина произлегува од познатиот договор од Пржино, како и од Владината програма за 2017-2020година, има и конкретен дел со конкретни мерки кои се однесуваат на работата на Собранието. Меѓу нив, има неколку мерки со кои јакнее надзорната улога на Собранието врз Владата, односно извршната власт, забележа собранискиот спикер, кој дополни дека сега гледа искрена определба на Владата и на парламентарното мнозинство овие реформи, како и сите други реформи да се прават исклучиво во полза на граѓаните и општеството во целост.
Тој рече дека како претседател на Собранието, секогаш ќе направи сè што му дозволува Деловникот, Законот за Собрание и Уставот со цел, опозицијата да може на транспарентен начин да ги изнесе своите политички и програмски интереси, предлози, аргументи и критики.
– Меѓутоа, во исто време, од опозицијата очекувам и одговорно однесување во целокупниот законодавен процес, односно ефикасно функционирање на Парламентот. Според мое мислење, некои потези на опозицијата кои деновиве ги гледа целокупната македонска јавност, но и нашите меѓународни пријатели и партнери, не ѝ помагаат ниту на парламентарната демократија, ниту на потребните реформи и на интеграциските процеси во ЕУ и НАТО. Како прв меѓу еднаквите, јас не сакам да судам, сепак, како претседател на Собранието, имам обврска да обезбедам нормално функционирање на законодавниот дом. Затоа, се надевам дека предложениот владин План познат како „3-6-9“, како и Владината програма 2017-2020, се добра основа за создавање на вистинска инклузивност помеѓу сите парламентарни политички субјекти, рече Џафери.
Тој побара инклузивност во евроинтеграциите и на експертската и академската јавност како и невладиниот сектор.