До 3 часот утрово траеше маратонската расправа на пратениците по Предлог завршната сметка за Буџетот за 2016 година. Се очекува оваа седница да продолжи денеска во 13 часот.
Седницата продолжи со меѓусебни реплики на пратениците на ВМРО-ДПМНЕ.
Претседателот на Собранието Талат Џафери забележа дека е некоректно пратеници од иста политичка партија сами на себе да си реплицираат.
По паузата која ја даде Џафери во 23 часот, а траеше до 1 по полноќ, тој на своето биро закачи две фотографии. На едната е прикажан лав и под него пишува „не е препорачливо да го разбудиш заспаниот лав“, а на другата знак за забрането спиење.
На дневен ред беше спроведувањето на буџетот за 2016 година, за што опозициската ВМРО-ДПМНЕ вели дека се работело домаќински, иако Македонија била во голема политичка криза.
За пратениците на СДСМ завршната сметка на буџетот покажува многу нерационални трошења.