Кревети без душеци, 80 лица сместени во две простории и за сите овие луѓе само еден тоалет во кој освен што ги извршуваат физиолошките потреби, тука ги чуваат и садовите во кои се служи храната. Условите во затворот Идризово се под секое човечко достоинство, а патем во затворот владее корупцијата. Може да се купат кревети, мобилни телефони, други подобности, па дури и дрога. Ова денеска на прес-конференција го кажа Народниот правобранител Иџет Мемети, презентирајќи го годишниот извештај.
„Во приемното одделение во Идризово спијат 80 лица. Сите користат еден тоалет, а повеќето спијат на картони и душеци на подот. Приборот за јадење го чуваат во единствениот тоалет. На нашето прашање, зошто само таму го чуваат приборот за јадење, ни одговорија дека само таму имале вода. Во Идризово се сместени вкупно 1966 лица, што е два пати повеќе од капацитетот на установата. Условите во оваа институција се под сите стандарди и го погазуваат човековото достоинство“, рече Мемети.
Ѕидовите во ова одделение биле со мувла, влага, покривот прокиснувал, а прозорците биле скршени. Во ова одделение лицата се задржувале повеќе од два месеца, освен оние што можеле да платат. Нив порано ги префрлале.
Правобранителот рече дека полошо од приемното одделение, било амбулантното одделение.
„Болните имаат избор, можат или да спијат на под или на кревет од пружина без душеци. Хигиената е на екстремно ниско ниво, храната е неквалитетна со лош квалитет и е недоволна. Да не се роднините и пријателите кои им носат храна, овие лица ќе бидат гладни“, рече Мемети.
Народниот правобранител рече исто лоша е и состојбата во женското одделение во Идризово. Тој рече дека по сите разговори и препораки кои ги направил лани, годинава состојбата била во уште полоша состојба. Според последниот извештај на правобранителот евидентиран е и тренд на регрутација на нови корисници на дроги.
Хигиената и стандардите се под секое ниво и во заводот Демир Капија. Штитениците спијат на речиси распаднати кревети.
„Проверка направивме и во 8 полициски станици, само 1 ги исполнуваше минималните стандарди. Во некои дури можеше да се најдат предмети кои можат да им наштетат на лицата“, рече Мемети.
Во овој извештај се направени вкупно 50 посети од кои 4 во казнено поправни установи, 8 во полициски станици, 1 во заводот во Демир Капија и 37 во центрите за згрижување бегалци.
Посетите ги правеле лица ангажирани со договор на дело, затоа што Македонија немала Национален превентивен механизам. Ангажирани биле криминолози, психолог и психијатар, правници, социјални работници и медицинска сестра.