Македонија, конечно, дочека прва победа и пласман во наредна квалификациска рунда на свој претставник во Лигата на шампиони. Постот што траеше повеќе од една деценија (2006 година) го прекина Вардар кој во реваншот го совлада Малме со 3:1 и се најави на двомеч со, најверојатно, Копенхаген во третото коло.
„Црвено-црните“ го елиминираа шведскиот првак со пресврт во второто полувреме на „Младост“ во Струмица. Грнчаров во 56 минута ја поништи предноста на гостите што ја осигура Розенберг од пенал во 16 минута. Пет минути по капитенот во листата на стрелци се впиша и Барсегјан кој отпадокот по нереализираниот пенал на Фелипе го претвори во гол за 2:1, а точка на секаква неизвесност стави Боан Николов во првата минута од судиското продолжение.
По воведните 20. минути што ги одиграа во грч, направија пенал и имаа негатива, „црвено-црните“ воспоставија рамнотежа и беа рамноправен партнер на тревникот иако паузата ја дочекаа со резултат што носеше прогрес на Швеѓаните.
Сликата комплетно се смени во продолжение на средбата. Вардарци тргнаа на се или ништо на што упати и замената на Седлоски (Блажевски наместо Глигоров). Македонскиот шампион ги помести линиите, презеде иницијатива и тргна во офанзива по, најпрво, израмнување. И, за негова среќа, успеа набрзо потоа. Грнчаров беше највисок по корнерот на Фелипе за симнување камен од срце и на стручниот штаб и на вардаровите фанови.
По исполнување на примарната цел се тргна по нова, водство што ќе значи да нема продолженија и исполнување на мисијата во основните 90 минути. И во тоа накусо потоа успеаја. Фелипе изнуди пенал што амиот го изведе, Виланд го „прочита“ Бразилецот, но не и Барсегјан. Ерменецот одлично ја демнеше ситуацијата со најстрогата казна, втрча навреме, и одбиената топка, сепак, ја смести во мрежата.
По вториот примен гол и Малме стави се на една карта. Тргна по втор гол и остави многу простор за вардарци кои го казнија со контра во финишот и за погодокот на довчерашниот младински репрезентативец ги реши сите дилеми околу победникот во двомечот и патникот во наредното коло.
Вардар ќе добие противник утревечер за кога е закажан реваншот меѓу Копенхаген и Жилина. Данците имаат 3:1 од гостувањето во Словачка, резултат што треба да го потврдат на домашен терен.
Вардар – Малме 3:1 (0:1)
Стадион: „Младост“ во Струмица. Гледачи: 5.000. Гл. судија: Анатолиј Жабченко. Асистенти: Александар Војтјук и Серхиј Бекер (сите тројца од Унгарија). Ж. картони: Гачевски, Новак, Фелипе, Блажевски (Вардар); Конате, Бергет, Брорсон, Сванберг (Малме). Стрелци: Грнчаров 56′, Барсегјан 61′, Николов 90’+1′ за Вардар; Розенберг 16′ (п) за Малме.
Вардар (формација: 4-2-3-1): Гачевски – Демири, Новак, Грнчаров, Хамбарѕумјан – Глигоров (Блажевски 46′), Спировски – Барсегјан (Брдаровски 73′), Николов, Фелипе – Балотели (Муслиу 85′). Тренер: Гоце Седлоски.
Малме (формација: 4-4-2): Виланд – Конате (Ракип 63′), Брорсон (Бенгстон 46′), Л. Нилсен, Тинерхолм – Јотун, Левицки (Сванберг 83′), Кристијансен, Еикрем – Бергет, Розенберг. Тренер: Магнус Першон.