Фудбалерите на Вардар изразуваат неверување по убедливиот пораз од Копенхаген и елиминацијата во Лигата на шампиони (ЛШ). Данската екипа го совлада македонскиот првак со 4:1, во реванш мечот од третото квалификациско коло, и си осигура место во утрешната ждрепка за елитното клупско натпреварување на УЕФА.
Пораз што боли, шок, евтини голови. Вака вардарци го опишаа настапот на стадионот „Паркен“ во данската престолнина вчеравечер. Имаа шанса што не се пропушта, имаа прилика што ретко се укажува, имаа резултат (2:1), имаа и играч повеќе на тревникот за последните 20 минути. Но, исклучувањето на Грегуш во 71 минута, наместо да им даде крилја на „црвено-црните“, вбризга решителност кај домашните кои со два гола до крајот го испратија составот на Гоце Седлоски во Лига Европа.
„Разочарување е присутно меѓу нас. Само 15 минути нè делеа во плеј-оф во Лигата на шампиони и во нив примивме евтини голови. Штета. Првиот примен гол по исклучувањето делуваше демотивирачки по нас. Не можевме да се вратиме до крајот. Што е тука е. Одиме напред. Имаме уште европски натпревари, наближува и почетокот на новата сезона. Колку и да боли овој пораз од Копенхаген, а боли, мора да гледаме напред“, истакна Бесир Демири.
Дваесетина минути, вклучувајќи го и судиското надополнување, ги делеа вардарци од радост, а трибините на стадионот „Паркен“ од тага. Но, ситуацијата експресно се смени во корист на данскиот претставник и на штета на македонскиот чии играчи се принудени да бараат утеха во второто по ранг УЕФА натпреварување.
„Случувањата во финишот не сакам ниту да ги анализирам ниту да ги коментирам. Сè уште сум во шок. Вакви порази болат и тешко се прифаќаат. Можам да кажам дека Вардар демонстрира потенцијал и квалитет да се носи со екипи како Малме и Копенхаген. Во очекување сме на ждрепката за Лига Европа каде, исто така, веруваме дека можеме да уживаме во успех“, рече вардаровиот стопер од Украина, Евгениј Новак.
Гол во рана фаза на натпревар е често посакуван момент во фудбалската игра. Копенхаген го направи тоа уште во втората минута. Николов возврати во 19, а Барсегјан несреќно го совлада Гачевски во 26. за 2:1 за Данците и неизвесност што зависеше од еден гол на чија страна ќе заврши мечот. Вардарци и така имаа резултат за премин, со уште еден гол ќе се „бетонираа“ во наредната фаза. Меѓутоа примија два со фудбалер помалку и мораа да се помират со елиминација на крајот.
„Разочарани сме. Имавме добар резултат од првата средба. Набрзина примивме гол во реваншот меѓутоа набрзина и израмнивме. Копенхаген се врати во водство со среќен гол по што добро се држевме. Имавме и фудбалер повеќе и наместо тоа да го искористиме, ние примивме два гола. Ова боли, но сигурен сум дека можеме до пласман во групите во Лига Европа“, нагласи голманот Гачевски.
Попладнево и вечерва се играат реванш дуелите од третото квалификациско коло за УЕФА Европа лигата, ждрепката за плеј-офот е закажана за утре во 13 часот по извлекување на двојките за ЛШ.