Церемониите на свечено отворање се неизбежен декор пред секој голем спортски настан. Во вообичаените сценарија, преку кои се испраќаат пораки до светот и се користат за афирмација на држава, на град домаќин или на култура, по традиција се вметнуваат и локални елементи. Исклучок притоа не беа ниту воведните содржини за фудбалскиот спектакл на УЕФА наречен „Суперкуп Скопје 2017“.
Увертирата, покрај распослани банери со клубовите учесници (во случајот на Реал Мадрид и на Манчестер јунајтед) и останати содржини, понуди и точка во траење од неколку минути. На тревникот на „Телеком арена“ излегоа членови на културно-уметнички друштва кои преку македонските ора „Копачка“ и „Малешевка“ дадоа свој придонес во фудбалскиот празник во главниот град на Македонија. Нивниот перформанс ја обиколи планетата со оглед дека слика од националната арена во Скопје одеше во 228 држави и региони на земјината топка.
Свои „пет минути“ по нив има и 19 дечиња со оштетен слух од училиштето „Партение Зографски“ кои на знаковен јазик ја изведоа нумерата „Sky full of stars“ (Небо полно со ѕвезди) од Колдплеј.