Беспоштедна работа за продолжување на патот по кој е зачекорен Вардар. Ова го најави Чедомир Јаневски при промоцијата за нов тренер на Вардар. Поранешниот македонски селектор го презема „црвено-црното“ фудбалско кормило од Гоце Седлоски кој неочекувано поднее оставка пред дуеот со Фенербахче во плеј-оф фазата за Лига Европа.
„Задоволството е големо. Среќен сум што се враќам во клубот во кој најмногу се афирмирав како играч и преку кој започнав интернационална кариера. Се надевам дека со професионална работа ќе продолжиме онаму каде што застанавме. Сите сме фокусирани да успееме со овој тим кој не е бренд само во Македонија туку и на просторите на поранешна Југославија. Да се биде дел од Вардар не претставува само чест туку и обврска“, истакна Јаневски кој се договори за двегодишна соработка со вардаровото раководство.
Јаневски, сепак, ќе дебитира на клупата на Вардар веќе во мечот со Фенербахче. Вчерашните информации упатуваа на Александар Васоски како прв предводник на „црвено-црните“ поради временскиот теснец до судирот со турскиот гигант, но новиот тренер е пријавен во Европската фудбалска асоцијација (УЕФА) и ќе диригира од клупата против ривалот од Истанбул.
„Во мечот ќе влезам со само два тренинга меѓутоа нема оправдување. Добар дел од фудбалерите ги познавам и имам искуство од времето кога бев селектор. Фенербахче е добро анализиран и непотребно е да се трошат зборови за каков тим се работи. Пред нас е ретка прилика да бидеме прв клуб што ќе заигра во групна фаза во натпреварување на УЕФА. Противникот е голем, располага со одлични индивидуалци, но и ние имаме квалитет и адути“, порача Јаневски.
За Јаневски ова е прво враќање во Вардар од каде замина пред 28 години како фудбалер.