Со нетрпение очекуваме одговор од обвинителството за улогата на господинот Живаљевиќ во настаните во Собранието, велат од Кабинетот на претседателот Ѓорѓе Иванов по најавата дека Обвинителството за организиран криминал и корупција дека ќе ја истражува вмешаноста на шефот на државата во настаните во Собранието на 27 април.
Кабинетот на претседателот на Република Македонија соопшти дека го поздравува интересот на јавното обвинителство и смета дека е тоа вистинскиот начин да се утврдат фактите и вистината, затоа што деновиве во јавноста се присутни лажни вести и лажни информации.
„Со нетрпение очекуваме одговор од обвинителството за улогата на г. Живаљевиќ во настаните во Собранието. Јавноста треба да знае кој го пратил, што превземал, со кого бил и дали имал одобрение од надлежен државен орган за влез во Собранието на критичниот ден.
Кабинетот на Претседателот уште еднаш ги повторува претходно искажаните ставови дека не е надлежен орган за известување и одобрување на влез во Собранието на Република Македонија и дополнува дека не е „дежурна служба за давање алиби”. Македонските граѓани имаат право да ја знаат вистината. Со овој став и претходно кажаното за нас случајот е затворен и ќе го чекаме резултатот од јавното обвинителство“, се наведува во соопштението од Кабинетот на претседателот.
Разузнавачот од српската БИА, Горан Живаљевиќ, пред два дена за агенцијата Танјуг изјави дека на 27 април на крвавиот четврток во Собранието присуствувал со одобрение на советникот за безбедност на претседателот Ѓорге Иванов, Синиша Алексовски.
-Моето присуство во Собранието не беше ни тајно ни скриено. Мојата мисија не беше ниту тајна, ниту недобронамерна, а над се македонските служби беа упатени во тоа, вели тој во првото обраќање во јавноста. Моето пријавување за активност таа вечер на 27 април беше насочено на самиот Кабинет на претседателот и на неговиот советник за безбедност, рече Живаљевиќ.
Оваа изјава на Живаљевиќ ја демантираа од Кабинетот на Иванов, од каде рекоа дека српскиот разузнавач не побарал дозвола, туку „по завршување на дејствијата и активностите во Собранието“, испратил пораки до лица вработени во институциите, меѓу кои и до советникот за безбедност на претседателот Ѓорге Иванов, дека бил во Собранието со цел да обезбеди алиби и да ја намали одговорноста за своето постапување“.
Од Кабинетот на претседателот на државата изјавија дека посочениот советник на Претседателот Иванов не е овластено лице за пријавување на движење и престој на странски претставници и тој во конкретниот случај постапил согласно безбедносните протоколи, за што изготвил и архивирал извештаи проследени до надлежните претпоставени.